الیکشن کمیشن نے شناختی کارڈز پر ادھورے ایڈریس مکمل کرنے کی تجویز دیدی

منگل 7 اکتوبر 2025 21:05

اسلام آباد (اُردو پوائنٹ اخبارتازہ ترین - این این آئی۔ 07 اکتوبر2025ء) الیکشن کمیشن نے قومی شناختی کارڈز پر ادھورے ایڈریس مکمل کرنے کی تجویز دے دی۔ جاری اعلامئے کے مطابق الیکشن کمیشن نے وفاقی حکومت کو تجویز دی ہے کہ گائوں دیہات کی سطح پر گلیوں اور گھروں کو بھی نمبر الاٹ کئے جائیں، نئے اور پرانے شناختی کارڈز پر پتے درست کیے جائیں، دیہاتوں میں بستیوں کی گلیوں اور مکانات کو بھی نمبر الاٹ کیے جائیں۔

(جاری ہے)

اعلامئے کے مطابق ووٹر لسٹوں اورپولنگ اسٹیشنز کے قیام میں مسائل پیدا ہوتے ہیں، گلی یا گھر نمبر موجود نہ ہونے کی وجہ سے تصدیق کا عمل مشکل ہو جاتا ہے، نامکمل ایڈریس سیووٹرز کی درست طور پر نشاندہی نہیں ہو پاتی۔بیان میں کہا گیا ہے کہ اسمبلیوں کی مدت ختم ہونے سے 6 ماہ قبل مردم شماری ہو تو حلقہ بندیاں نہیں ہونی چاہییں، الیکشن میں تاخیر سے بچنے کیلئے حلقہ بندیاں الیکشن کے بعد ہوں گی، انتخابات سے قبل ووٹر فہرستوں کی نظرثانی کے دوران عملے کی بھرتی بھی ایک بڑا چیلنج رہی، ووٹرز رجسٹریشن تصدیق میں شامل سٹاف کو الیکشن آفیشل ڈیکلیئر کیا جائے۔ غلطی کی صورت میں ان کے خلاف کارروائی کی جا سکے گی۔