فنانسرکو انسانی گوشت پان میں ڈال کر کھلایا، مہیش بھٹ کا انکشاف

بدھ 8 اکتوبر 2025 12:36

ممبئی (اُردو پوائنٹ اخبارتازہ ترین - این این آئی۔ 08 اکتوبر2025ء) بالی وڈ کے مشہور فلم ساز مہیش بھٹ نے تانترک کے کہنے پر فنانسر کو انسانی گوشت پان میں ڈال کر کھلانے کا انکشاف کیا ہے ۔حال ہی میں فلم میکر مہیش بھٹ نے بیٹی پوجا بھٹ کو دیے گئے ایک انٹرویو میں اپنے فلمی کیرئیر کے آغاز میں کی گئی جدوجہد پر بات کی۔مہیش بھٹ کے مطابق کیرئیر کے آغاز میں جب وہ فلمیں بنانے کیلئے ایک مشکل دور سے گزررہے تھے اس دوران ان کے دوست ارون دیسائی نے انہیں بہار کے شہر گیا میں ایک فنانسر سے ملاقات کا مشورہ دیا۔

مہیش بھٹ نے بتایا کہ ان کے دوست نے فنانسر سے ملاقات سے پہلے اپنے ایک گورو سے ملنے کا فیصلہ کیا، جب ہم گورو سے ملنے ان کے مقام تک پہنچے تو وہاں ان سے ملنے کیلئے آنے والے افراد کی لمبی قطاریں موجود تھیں ، وہ گورو دراصل ایک نوجوان تانترک تھا جو اپنے ہاتھ میں رم کی بوتل لے کر ناچتا رہتا تھا۔

(جاری ہے)

فلمساز نے بتایا کہ اس گرو نے مجھے دیکھتے ہی پہچان لیا کہ میں اس کی تانترک طاقتوں کا قائل نہیں ہوں، اس نے ہمیں امید دلاتے ہوئے اگلے دن آنے کا کہا، جب اگلے دن ہم وہاں پہنچے تو اس تانترک نے اپنی الماری کھول کر ریپر میں لپٹی ہوئی گیند جیسی شے نکالی اور اس میں سے ایک ٹکرا نکال کر کاغذ میں لپیٹ کر ہمیں دیتے ہوئے کہا کہ یہ انسانی گوشت ہے جو گھاٹوں سے لیا گیا ہے، اسے لے جا اور اپنے فنانسر کو کھلا، وہ تمہیں پیسے دے گا۔

مہیش بھٹ کے مطابق اس کے بعد وہ اور ان کے دوست پرامید ہوکر فنانسر سے ملنے جاپہنچے، فنانسر گیا کے مضافات کا ایک زمیندار تھا، اس کے سکیورٹی گارڈ بندوقیں تانے اس کے ساتھ کھڑے رہتے تھے، ہم پہلے دن اسے گوشت کھلانے میں ناکام رہے، اگلے روز ہم نے فنانسر کو پان میں گوشت ڈال کر کھلانے کا منصوبہ بنایا ، اگلی ملاقات کے لیے ہم فنانسر کے پاس پان لے کر گئے اور اسے کئی منت سماجت کے بعد پان کھانے کے لیے قائل کرلیا۔انہوں نے بتایا کہ فنانسر نے ہماری آنکھوں کے سامنے چبا چباکر پان کھایا اور ہم خوش ہوگئے سوچنے لگے کہ اب پیسوں کا مسئلہ حل ہوگیا لیکن بعد میں انہیں اپنے دوست سے معلوم ہوا کہ اس آدمی نے ہمیں پیسے دینے سے انکار کردیا۔