بھارتی کھلاڑیوں اورفنکاروں پر سیاسی دبا ئوبہت ہے، فیصل قریشی

بدھ 8 اکتوبر 2025 12:36

لاہور (اُردو پوائنٹ اخبارتازہ ترین - این این آئی۔ 08 اکتوبر2025ء) پاکستانی انڈسٹری کے معروف اداکار و میزبان فیصل قریشی کا کہنا ہے کہ بھارتی کھلاڑیوں اور فنکاروں کی غلطی نہیں ہے ان کے اوپر سیاسی دبائو بہت ہے۔حال ہی میں اداکار نے ایک میگزین کے پوڈکاسٹ کو انٹرویو دیا، جس میں انہوں نے مختلف امور پر اپنے خیالات کا اظہار کیا۔

(جاری ہے)

حالیہ پاک بھارت کشیدگی کے بعد فنکاروں پر عائد پابندی اور ایشیا کپ میں ہونے والے ہینڈ شیک تنازع پر ردعمل دیتے ہوئے فیصل قریشی نے بھارتی فنکاروں اور کھلاڑیوں کی حمایت کر دی اور کہا کہ وہ سیاسی دبائو میں ہیں۔

انہوں نے اپنے خیالات کا اظہار کرتے ہوئے کہا کہ بھارت کی سیاست ہی ایسی ہے، پہلے ڈرامے بند کر دیے، پھر ایشیا کپ سے قبل ایک ایوینٹ میں بھارتی کپتان اور محسن نقوی کے ہاتھ ملانے پر شدید تنقید کی اور پورا شو اسی پر کیا، جس کی وجہ سے ان کے کھلاڑیوں پر شدید دبائو پے۔انہوں نے کہا کہ ہم سمجھتے ہیں کہ ان کے کھلاڑیوں کو واپس اسی ملک میں جانا ہے ، وہاں رہنا ہے، لیکن محسن نقوی سے جیتی ہوئی ٹرافی نہ لینے پر دبئی میں موجود بھارتی فینز بھی مایوس ہوئے ہیں۔