سعودی فضائی کمپنی ریاض ایئر کا 26 اکتوبر کو لندن کے لیے پہلی پرواز شروع کرنے کا اعلان

جمعرات 9 اکتوبر 2025 10:20

ریاض (اُردو پوائنٹ اخبارتازہ ترین - اے پی پی۔ 09 اکتوبر2025ء) سعودی عرب کی نئی قومی فضائی کمپنی ریاض ایئر نےلندن کے لئے پروازیں 26 اکتوبر سے شروع کرنے کا اعلان کیا ہے۔ اردو نیوز کے مطابق کمپنی انتظامیہ نے اعلان کیا ہے کہ ریاض سے لندن کے ہیتھرو ایئرپورٹ کے لئے پہلی پرواز 26 اکتوبر کو روانہ ہوگی۔ ریاض سے لندن جانے والی پہلی پرواز بوئنگ 787-9 تیکنیکی سپیئر طیارے کے ساتھ ریاض سے لندن کے ہیتھرو ایئرپورٹ کے لئے روانہ ہوگی جسے عربی میں ’جمیلہ‘ (خوبصورت ) کا نام دیا گیا ہے۔

پہلے مرحلے کے آپریشنل پروگرام کے تحت سفر کرنے والوں میں ریاض ایئر کے ملازمین اور مخصوص گروپس کے لئے ٹکٹ فروخت کئے جائیں گے تاکہ سروس کے معیار کو بہتر بنانے کے لئے تجرباتی مراحل کو مکمل کیا جا سکے۔

(جاری ہے)

ریاض ایئر کی پہلی پرواز ’آر ایکس 401 ‘ ریاض کے کنگ خالد انٹرنیشنل ایئرپورٹ سے علی الصبح 3 بج کر 15 منٹ پر روانہ ہو گی جو لندن کے ہیتھرو ایئرپورٹ پر 7 بج 30 منٹ پر پہنچے گی جبکہ واپسی کی پرواز آر ایکس 402 لندن کے مقامی وقت کے مطابق صبح9 بج کر 30 منٹ پر اڑان بھرے گی جو ریاض کے وقت کے مطابق 7 بج کر 15 منٹ پر لینڈ کرے گی۔

ایئرلائن کی جانب سے لائیلٹی پروگرام ’’سفیر‘‘ بھی شروع کیا گیا ہے۔ ابتدائی رجسٹریشن کرانے والے ممبران کو بکنگ کی سہولت و دیگر مراعات حاصل ہوں گی۔ یاد رہے کہ سعودی عرب کی نئی قومی ایئر لائن ریاض ایئر کا اعلان 2023 میں کیا گیا تھا جو سعودی پبلک انویسٹمنٹ فنڈ کی ملکیت ہے۔ سعودی عرب کی جانب سے ریاض ایئر کو اپنے دوسرے فلیگ شپ کیریئر کے طور پر متعارف کرانا وژن 2030 کے مقاصد کے مطابق مملکت کی تیزی سے عالمی سیاحتی مقام میں تبدیلی کے ساتھ ہم آہنگ کرنا ہے۔ مملکت کا مقصد قومی سیاحت کی حکمت عملی کے تحت جی ڈی پی میں سیاحت کے شعبے کی شراکت کو 10 فیصد سے زیادہ کرنا ہے