جامعہ کراچی کی بس کی زد میں آکر طالبہ جاں بحق،شیخ الجامعہ نے واقعے کا نوٹس لیتے ہوئے تحقیقاتی کمیٹی تشکیل دے دی

واقعے کے بعد جامعہ کراچی کی بس کے ڈرائیور کو حراست میں لے لیا گیا تاہم جاں بحق طالبہ کے اہلخانہ کا قانونی کارروائی سے انکار

جمعہ 10 اکتوبر 2025 14:00

جامعہ کراچی کی بس کی زد میں آکر طالبہ جاں بحق،شیخ الجامعہ نے واقعے کا ..

کراچی(اُردو پوائنٹ اخبارتازہ ترین - این این آئی۔ 10 اکتوبر2025ء) جامعہ کراچی کی بس کی زد میں آکر ایک طالبہ جاں بحق ہوگئی۔پولیس حکام کے مطابق متاثرہ طالبہ جامعہ کراچی کی بس میں سوار تھی اور بس سے اترتے ہوئے طالبہ کے ساتھ حادثہ پیش آیا۔عینی شاہدین بتایا کہ طالبہ پوائنٹ کے پچھلے دروازے سے اتری تھیں کہ پوائنٹ ریورس ہوتے ہی وہ پچھلے پہیوں کے نیچے آ گئیں، جس کے بعد زخمی طالبہ کو فوری اسپتال منتقل کیا گیا تاہم وہ زخموں کی تاب نہ لاتے ہوئے دم توڑ گئیں۔

حادثہ صبح 9 بج کر 15 منٹ پر پیش آیا۔واقعے کے بعد جامعہ میں افسوس کی فضا پھیل گئی جب کہ طلبہ کی بڑی تعداد نے احتجاج کیا۔طلبہ نے جامعہ انتظامیہ سے مطالبہ کیا کہ حادثے کی تحقیقات کرائی جائیں اور مستقبل میں ایسے سانحات سے بچنے کے لیے جامعہ کے اندر ٹریفک کنٹرول کے موثر انتظامات کیے جائیں۔

(جاری ہے)

مظاہرین نے یونیورسٹی انتظامیہ کے خلاف نعرے بازی کی۔

مظاہرین طلبہ نے کہاکہ یونیورسٹی میں ٹریفک کے حوالے سے کوئی واضح نظام موجود نہیں ہے، نہ ہی اسپیڈ بریکرز یا سائن بورڈز نصب کیے گئے ہیں، جس سے طلبہ کی جانیں خطرے میں ہیں۔ انہوں نے جاں بحق طالبہ کے اہل خانہ کے لیے مالی امداد فراہم کرنے کا بھی مطالبہ کیا۔واقعے کی اطلاع ملتے ہی پولیس اور امدادی اداروں کے اہلکار موقع پر پہنچے۔مبینہ ٹائون پولیس کے مطابق جامعہ کی بس کے ڈرائیور کو حراست میں لے لیا گیا ہے، تاہم متوفیہ کے اہلِ خانہ نے شور مچا کر ڈرائیور کو چھڑوا لیا۔

.اہلِ خانہ نے مقدمہ درج کرانے اور کسی بھی قانونی کارروائی سے انکار کر دیا ہے۔شیخ الجامعہ خالد عراقی نے واقعے کا نوٹس لیتے ہوئے تحقیقاتی کمیٹی تشکیل دے دی، کمیٹی این ای ڈی یونیورسٹی کے شعبہ ٹرانسپورٹ کے انچارج اور 2طالب علموں پر مشتمل ہے جبکہ شعبہ کرمنالوجی کی نائمہ سعیدکو کمیٹی کا کنوینر مقرر کیا گیا ہے۔