ایبٹ آباد،ڈپٹی کمشنر کی زیر صدارت ڈسٹرکٹ پولیو اریڈیکیشن کمیٹی کا اجلاس

جمعہ 10 اکتوبر 2025 21:30

ایبٹ آباد (اُردو پوائنٹ اخبارتازہ ترین - اے پی پی۔ 10 اکتوبر2025ء) ڈپٹی کمشنر ایبٹ آباد سرمد سلیم اکرم کی زیر صدارت ڈسٹرکٹ پولیو اریڈیکیشن کمیٹی کا اجلاس ڈپٹی کمشنر آفس میں منعقد ہوا۔اجلاس میں ضلعی انتظامیہ، محکمہ صحت، ایجوکیشن، پولیس اور دیگر متعلقہ محکموں کے افسران نے شرکت کی۔ڈسٹرکٹ پولیو کنٹرول روم کی جانب سے مہم کے حوالے سے تفصیلی بریفنگ دی گئی۔

بتایا گیا کہ چار روزہ مہم کے دوران ضلع ایبٹ آباد کی 54 یونین کونسلز میں پانچ سال تک کی عمر کے 2,25,469 بچوں کو پولیو سے بچاؤ اور وٹامن اے کے قطرے پلائے جائیں گے۔ مہم کے دوران 6 ماہ سے 11 ماہ کے بچوں کو نیلے رنگ کے وٹامن اے لیکویڈ کیپسول جبکہ 12 ماہ سے 59 ماہ کے بچوں کو سرخ رنگ کے وٹامن اے ڈراپس پلائے جائیں گے۔ اس مقصد کے لیے 1688 ٹیمیں تشکیل دی گئی ہیں جو گھر گھر جا کر ویکسینیشن کا عمل مکمل کریں گی۔

(جاری ہے)

ڈپٹی کمشنر ایبٹ آباد نے شرکاء سے بات چیت کرتے ہوئے کہا کہ تمام ٹیموں کی ٹریننگ اور استعداد کار کو بہتر بنایا جائے۔ شہری اور دیہی علاقوں میں پولیو ٹیموں کی مکمل رسائی یقینی بنائی جائے۔فکسڈ سینٹرز اور ٹرانزٹ ٹیموں کی مؤثر مانیٹرنگ کی جائے۔ٹیموں کی سکیورٹی کے لیے پولیس کے ساتھ مکمل رابطہ رکھا جائے اور پولیو رفیوزلز کیسز پر کارروائی عمل میں لاتے ہوئے بچوں کی ویکسینیشن یقینی بنائی جائے۔

پولیو سے متعلق آگاہی کے لیے پرنٹ، الیکٹرانک اور سوشل میڈیا کا بھرپور استعمال کیا جائے۔اجلاس میں ایڈیشنل ڈپٹی کمشنر جنرل، ڈسٹرکٹ ہیلتھ آفیسر، ڈپٹی ڈسٹرکٹ ہیلتھ آفیسر، ایم ایس ڈی ایچ کیو، ڈی ایس پی ہیڈکوارٹر، ایریا کوآرڈینیٹر ڈبلیو ایچ او، ڈی ایس اوز، ہیلتھ کوآرڈینیٹرز، پی ای آئی کوآرڈینیٹر اور دیگر افسران نے شرکت کی۔