ڈپٹی کمشنر ڈاکٹر فرحان فاروق کی زیر صدارت انسداد پولیو مہم کے انتظامی امور بارے جائزہ اجلاس کا انعقاد

بہاولپور (اُردو پوائنٹ اخبارتازہ ترین - اے پی پی۔ 10 اکتوبر2025ء) ڈپٹی کمشنر ڈاکٹر فرحان فاروق نے کہا ہے کہ انسدادِ پولیو کی قومی مہم کے دوران پانچ سال سے کم عمر 8لاکھ 24 ہزار 301 بچوں کو پولیو سے بچاؤ کی حفاظتی ویکسین کے قطرے پلائے جائیں گے،سیلاب زدہ علاقوں اور مہاجر آبادیوں کے بچوں کو پولیو ویکسین کے قطرے پلانے پر خصوصی توجہ دی جائے اور ان علاقوں میں بچوں کی ویکسینیشن کو 100 فیصد یقینی بنایا جائے، 4 روزہ انسدادِ پولیو کی قومی مہم کا آغاز 13 اکتوبر بروز سوموار سے ہوگا جو 16 اکتوبر جمعرات تک جاری رہے گی،انسداد پولیو مہم کی سو فیصد کامیابی کیلئے ضلع بھر کی 120 یونین کونسلوں میں مانیٹرنگ آفیسرز، 667 ایریا انچارج، 3276 موبائل ٹیمیں، 195 فکسڈ ٹیمیں جبکہ 136 ٹرانزٹ پوائنٹس پر ٹیمیں تعینات کی گئیں ہیں۔

(جاری ہے)

وہ اپنے دفتر کے کمیٹی روم میں انسدادِ پولیو مہم کے حوالے سے منعقدہ جائزہ اجلاس کی صدارت کررہے تھے۔ انہوں نے ڈسٹرکٹ ہیلتھ اتھارٹی کے افسران کو ہدایت کی کہ انسدادِ پولیو مہم کے دوران زیرو ڈوز بچوں کی ویکسی نیشن کو ہر ممکن صورت یقینی بنایا جائے۔ ڈپٹی کمشنر بہاولپور نے اجلاس سے خطاب کرتے ہوئے کہاکہ ہمیں گزشتہ پولیو مہم کے تجربات سے استفادہ کرنا ہے اور کارکردگی میں بہتری لانی ہے۔

انہوں نے کہا کہ بچوں کو پولیو سے بچاؤ کی حفاظتی ویکسین کے قطرے پلانا ایک قومی فریضہ ہے۔ انہوں نے مزیدکہا کہ والدین انسداد پولیو مہم میں ذمہ داری کا مظاہرہ کرتے ہوئے بچوں کو عمر بھر کی معذوری سے بچائیں۔ انہوں نے کہاکہ بچوں کو عمر بھر کی معذوری سے بچانا دراصل انسانیت کی خدمت کرنا ہے۔ ڈپٹی کمشنر نے انسداد پولیو مہم کے اہداف کے حصول کیلئے محکمہ صحت اور دیگر متعلقہ محکموں کی جانب سے اُٹھائے جانے والے اقدامات میں بہتری لانے کے لیے ہدایات دیں۔

انہوں نے کہاکہ ٹیموں کو فنگر مارکنگ، ڈور مارکنگ سمیت دیگر امور بارے تفصیلی رہنمائی فراہم کی جائے اور دور دراز علاقوں میں رسائی ممکن بنائی جائے تاکہ انسداد پولیو مہم کے انعقاد کے دوران کسی بھی قسم کی ممکنہ پریشانی سے بچا جا سکے۔ اجلاس میں چیف ایگزیکٹو آفیسر ہیلتھ بہاولپور ڈاکٹر عامر بشیر نے انسداد پولیو مہم کے اہداف کے حصول بارے اجلاس کوتفصیلی بریفنگ دی۔ اجلاس میں ایڈیشنل ڈپٹی کمشنر جنرل محمد طیب، اسسٹنٹ کمشنرز بہاولپور سٹی خلیل احمد، بہاول پور صدر قراۃ العین، ڈی ایچ او ڈاکٹرخالد چنڑ، ڈبلیو ایچ او کے نمائندہ، ڈپٹی ڈائریکٹر لوکل گورنمنٹ خورشید احمد سمیت دیگر متعلقہ محکموں کے افسران اجلاس میں شریک تھے۔