میئر کراچی نے سابقہ حب ریور روڈ کو سرکاری طور پر "شاہراہِ مفتی محمود" کے نام سے منسوب کیے جانے کا باضابطہ افتتاح کردیا

کراچی(اُردو پوائنٹ اخبارتازہ ترین - این این آئی۔ 10 اکتوبر2025ء) میئر کراچی بیرسٹر مرتضی وہاب نے شیرشاہ چوک پر منعقدہ ایک پروقار تقریب میں شیرشاہ سے حب چوکی تک سابقہ حب ریور روڈ کو سرکاری طور پر "شاہراہِ مفتی محمود" کے نام سے منسوب کیے جانے کا باضابطہ افتتاح کردیا۔ تقریب میں جمعیت علمائے اسلام سندھ کے نائب امیر قاری محمد عثمان، ضلع کیماڑی کے امیر قاضی فخر الحسن، جنرل سیکریٹری سید اکبر شاہ ہاشمی، سٹی کونسل میں جے یو آئی کے پارلیمانی لیڈر مفتی محمد خالد، چیئرمین قاضی امین الحق آزاد سمیت ایم پی اے آصف موسی اور پی پی پی پارلیمانی لیڈر کرم اللہ وقاصی سمیت جییوآئی اور پیپلزپارٹی کے عہدیداروں نے خطاب کیا جبکہ بڑی تعداد میں جییوآئی کے رہنماو کارکنان شریک تھے۔

تقریب سے خطاب کرتے ہوئے میئر کراچی بیرسٹر مرتضی وہاب نے کہا کہ میرے لیے یہ باعثِ اعزاز اور فخر کی بات ہے کہ میں بطورِ میئر کراچی، ایک ایسی عظیم شخصیت کے نام سے منسوب شاہراہ کا افتتاح کر رہا ہوں، جنہوں نے اپنی پوری زندگی اسلام، جمہوریت اور عوامی خدمت کے لیے وقف کر دی۔

(جاری ہے)

مولانا مفتی محمود نہ صرف پاکستان کی سیاسی و دینی تاریخ کے درخشاں باب ہیں بلکہ وہ ایک ایسی مخلص قیادت کا استعارہ ہیں جنہوں نے کردار، علم اور بصیرت سے قوم کی رہنمائی کی۔

انہوں نے مزید کہا کہ یہ لمحہ بھی تاریخی اہمیت رکھتا ہے کہ مفتی محمود نے اپنی زندگی کی آخری تاریخی تقریر بھی شیرشاہ میں کی تھی اور آج اسی علاقے و مقام پر ان کے نام سے منسوب شاہراہ کا افتتاح کیا جا رہا ہے۔ میئر کراچی نے کہا کہ ہماری نسلوں پر لازم ہے کہ ایسی شخصیات کے افکار اور خدمات کو زندہ رکھیں جنہوں نے اصولوں اور نظریات پر سمجھوتہ کیے بغیر قوم کو اتحاد، ایمان اور نظم و ضبط کا پیغام دیا۔

مرتضی وہاب نے مفتی محمود کی قومی خدمات کا خصوصی طور پر ذکر کرتے ہوئے کہا کہ مفتی محمود وہ عظیم ہستی ہیں جنہوں نے اسلام اور وطنِ عزیز کے لیے بے مثال جدوجہد کی۔ جس طرح ذوالفقار علی بھٹو نے ملک کو متفقہ آئین دیا، اسی طرح اس آئین کو متفقہ بنانے میں مفتی محمود کا کردار تاریخ کا روشن باب ہے۔ یہ اکابرین ہمارے محسن ہیں، ان کے کارناموں کو یاد رکھنا اور نئی نسل تک پہنچانا ہم سب کی ذمہ داری ہے۔

جمعیت علمائے اسلام سندھ کے نائب امیر قاری محمد عثمان نے میئر کراچی بیرسٹر مرتضی وہاب کا شکریہ ادا کرتے ہوئے کہا کہ شاہراہِ مفتی محمود کا نام محض ایک سڑک کا تعارف نہیں، بلکہ یہ کراچی کے تاریخی، فکری اور دینی تشخص میں ایک روشن اضافہ ہے۔ یہ اقدام ان عظیم اکابرین کی خدمات کے اعتراف کا مظہر ہے جنہوں نے اس ملک کی فکری و نظری بنیادوں کو مضبوط کیا۔ میئر کراچی کا یہ فیصلہ خراجِ عقیدت کے ساتھ ساتھ ایک مثبت پیغام بھی ہے کہ شہرِ قائد اپنے محسنوں کو فراموش نہیں کرتا۔