Live Updates

پنجاب کے تمام ٹول پلازوں پر پرچی سسٹم ختم، مکمل ڈیجیٹلائزیشن کا فیصلہ

صوبے کے 38 ٹول پلازوں پر موٹروے کی طرز پرون ایپ، ون سسٹم متعارف کرایا جائے گا

ساجد علی منگل 14 اکتوبر 2025 15:02

پنجاب کے تمام ٹول پلازوں پر پرچی سسٹم ختم، مکمل ڈیجیٹلائزیشن کا فیصلہ

لاہور ( اُردو پوائنٹ اخبارتازہ ترین۔ 14 اکتوبر2025ء ) پنجاب کے تمام ٹول پلازوں پر پرچی سسٹم ختم کرتے ہوئے مکمل ڈیجیٹلائزیشن کا فیصلہ کرلیا گیا۔ تفصیلات کے مطابق وزیراعلیٰ پنجاب مریم نواز کی زیر صدارت اجلاس ہوا جس میں پنجاب کے تمام ٹول پلازوں پر پرچی کا نظام ختم کرنے اور مکمل ڈیجیٹلائزیشن کا فیصلہ کیا گیا، اجلاس میں مختلف محکموں نے ترقیاتی منصوبوں پر بریفنگ دی جن میں ٹرانسپورٹ، تعمیرات، توانائی بچت اور شہری خوبصورتی کے منصوبے شامل تھے، اجلاس میں فیصلہ ہوا کہ پنجاب کے 38 ٹول پلازوں پر موٹروے کی طرز پرون ایپ، ون سسٹم متعارف کرایا جائے گا۔

بتایا گیا ہے کہ یہ فیصلہ عوام کو سہولت فراہم کرنے اور آمدورفت میں شفافیت اور تیزی لانے کے لئے کیا گیا ہے، وزیراعلیٰ کی صدارت میں ہونے والے اجلاس میں پانچ بڑی سڑکوں کی تعمیر، مرمت اور بحالی کے منصوبوں کیلئے پبلک پرائیویٹ شراکت داری کی منظوری بھی دی گئی، ان منصوبوں میں نجی ادارے کام کریں گے اور حکومت ان کے ساتھ اشتراک کرے گی، اس عمل سے اخراجات میں کمی اور کام کی رفتار میں بہتری کا امکان ہے، ای ٹینڈرنگ کے ذریعے پنجاب میں 40 ارب روپے کی بچت ہوئی، وزیراعلیٰ نے نئی بننے والی تمام سڑکوں پر سولر سٹریٹ لائٹس لگانے کا حکم دیا تاکہ توانائی کی بچت ہو اور ماحول دوست نظام کو فروغ حاصل ہو۔

(جاری ہے)

بریفنگ سے معلوم ہوا کہ حالیہ سیلاب سے متاثرہ 54 پل، 142 چھوٹے پل اور 858 سڑکیں مکمل طور پر بحال کر دی گئی ہیں،مری کی تمام روڈز، چکوال اور ساہیوال کی بیشتر سڑکوں کی تعمیر و مرمت کے پراجیکٹ مکمل ہوچکے ہیں، اجلاس میں لاہور کی خوبصورتی کے لئے بھی متعدد منصوبے منظور کیے گئے، جس کے تحت ریلوے سٹیشن کے سامنے پارک میں فوارہ اور بچوں کیلئے منی ٹرین بھی چلانے کا فیصلہ کیا گیا، سٹیشن کے تین کلومیٹر کے اطراف میں نئی سڑکیں اور فٹ پاتھ بھی بنائے جائیں گے۔