پاکستان میں پہلی مرتبہ مقامی خاتون کے عطیہ کردہ قرنیہ کی کامیاب پیوند کاری، بصارت کی بحالی کا تاریخی سنگ میل

ہفتہ 11 اکتوبر 2025 11:10

اسلام آباد (اُردو پوائنٹ اخبارتازہ ترین - اے پی پی۔ 11 اکتوبر2025ء) پاک فوج کے ماہر سرجنز نے پاکستان میں پہلی بار مقامی خاتون کے عطیہ کردہ قرنیہ کی کامیاب پیوند کاری کر کے تاریخ رقم کر دی۔تفصیلات کے مطابق آرمڈ فورسز انسٹی ٹیوٹ آف اوفتھامولوجی (اے ایف آئی او) نے فوجی آپریشن میں بینائی سے محروم ہونے والےدو سپاہیوں کی بصارت بحال کر کے ایک اور تاریخی سنگ میل طے کر لیا۔

میجر جنرل (ر) سید ظفر مہدی عسکری کی مرحومہ اہلیہ کی وصیت پر قرنیہ اے ایف آئی او کو عطیہ کیا گیا۔

(جاری ہے)

30 سالہ سپاہی علی اللہ اور 26 سالہ سپاہی فلک شیر کی آنکھوں میں قرنیہ کی کامیاب پیوند کاری کی گئی۔دونوں سپاہی اپنے فرائض کی انجام دہی کے دوران دہشت گردوں کے خلاف آپریشن میں اپنی بصارت سے محروم ہوئے تھے۔ اے ایف آئی او کے ماہرسرجنز کا پیشہ ورانہ کردار قابل تحسین ہے۔

اس تاریخی موقع پر مرحومہ کی بیٹی زہرہ مہدی نے والدہ کی قربانی پر فخر کا اظہار کیا۔زہرہ مہدی نے کہا کہ سب سے بڑا اعزاز یہ ہے کہ والدہ کی آنکھیں دو بہادر فوجیوں کو عطیہ کی گئیں،والدہ کے عطیہ کردہ قرنیہ سے سپاہیوں کی زندگی میں روشنی لوٹ آئی جو کہ صدقہ جاریہ ہے، اے ایف آئی او کی جدید سرجری سے بصارت کی بحالی کا تاریخی کارنامہ قابل تحسین ہے۔