Live Updates

طالبان سے بات چیت کے حامی ہیں، یہ پنجاب نہیں، یہاں عوام کی بات سے ہی معاملات حل ہوں گے،جنید اکبر

ہفتہ 11 اکتوبر 2025 23:07

پشاور (اُردو پوائنٹ اخبارتازہ ترین - این این آئی۔ 11 اکتوبر2025ء) رہنماء پی ٹی آئی جنید اکبر نے کہا ہے کہ ہم طالبان سے بات چیت کے حامی ہیں، بات چیت کے ذریعے ہی حل نکل سکتا ہے، یہ کوئی پنجاب نہیں، یہاں عوام کی بات سے ہی معاملات بڑھیں گے۔پشاور میں پریس کانفرنس سے خطاب کرتے ہوئے جنید اکبر نے کہا کہ سہیل آفریدی پر پارٹی نے اعتماد کیا، پارٹی اسے کامیاب بنائے گی، سابق فاٹا سے چیف منسٹر کو لانے کا مقصد قبائلی عوام کی محرومیوں کو دور کرنا ہے، سی ایم کے انتخاب کے لئے روڑے اٹکائے جا رہے ہیں، ایسے اقدامات سے فاٹا کی عوام کو غلط میسج جائیگا۔

انہوں نے کہا کہ صوفی محمد کی تحریک میں کس کا ہاتھ ہے، سب کو پتا ہے، نصیر اللہ بابر نے خود کہا تھا کہ ہم نے دہشتگردوں کو ٹریننگ دی، 22بڑے آپریشنز کا کیا اثر ہوا چودہ ہزار چھوٹے بڑے آپریشنز میں دہشتگردی بڑھ گئی یا کم ہوئی، ایسے واقعات سے اداروں اور عوام کے مابین فاصلے بڑھتے ہیں۔

(جاری ہے)

جنید اکبر نے کہا کہ ہم طالبان سے بات چیت کے حامی ہیں، بات چیت کے ذریعے ہی حل نکل سکتا ہے، میں چاہتا ہوں کہ میں پرو اسٹیبلشمنٹ بنوں، اسٹیبلشمنٹ اور عوام کے درمیان فاصلے کم کرنا چاہتے ہیں، یہ کوئی پنجاب نہیں ، یہاں عوام کی بات سے ہی معاملات بڑھیں گے۔

انہوں نے کہا کہ سیف ہائوس کے مکینوں کو کے پی میں نہیں بٹھایا جا سکتا، کوئی غلط فہمی میں نہ رہے ، ہم مفاہمت چاہتے ہیں، اگر پی ٹی آئی کو توڑا تو تب بھی پی ٹی آئی کا ووٹ کم نہیں ہوسکتا، جبر و ظلم سے بھٹو کا نام ختم نہیں ہوسکا۔ انہوں نے کہا کہ ہماری پارلیمانی میٹنگ ہوئی ہے ، 92ممبران سہیل آفریدی کو ووٹ دیں گے، ہماری پارٹی تمام کارکنان سہیل افریدی کے ساتھ کھڑے ہیں،ہ سہیل آفریدی کو وزیراعلی منتخب کروائیں گے۔