راولپنڈی اور اسلام آباد میں تیسرے روز بھی سڑکیں بند، میٹرو بس سروس بدستور معطل، شہریوں کو آمد و رفت میں سخت مشکلات، موبائل انٹرنیٹ سروس جزوی بحال

اتوار 12 اکتوبر 2025 12:15

اسلام آباد/راولپنڈی(اُردو پوائنٹ اخبارتازہ ترین - این این آئی۔ 12 اکتوبر2025ء) جڑواں شہروں راولپنڈی اور اسلام آباد میں تیسرے روز بھی متعدد سڑکیں بند رہیں، تاہم موبائل فون اور سیلولر انٹرنیٹ سروس جزوی طور پر بحال کر دی گئی۔تفصیلات کے مطابق اسلام آباد اور راولپنڈی میں مذہبی جماعت کے احتجاج کے باعث تیسرے روز بھی معمولاتِ زندگی شدید متاثر ہوئے، مختلف شاہراہوں اور داخلی راستوں کی بندش کے سبب شہریوں کو آمد و رفت میں سخت مشکلات کا سامنا رہا جبکہ میٹرو بس سروس بدستور تاحکم ثانی معطل ہے۔

راولپنڈی کے اندرون شہر رہائشی علاقوں کو جانے والے راستے ٹریفک کیلئے کھول دیے گئے ہیں جبکہ مری روڈ سے ملحقہ علاقوں کی گلیوں سے رکاوٹیں ہٹا دی گئیں تاہم راولپنڈی اسلام آباد کی اہم شاہراہیں بند رہیں، مری روڈ، فیض آباد، ایکسپریس وے اور آئی جے پی روڈ بند رہا ۔

(جاری ہے)

ذرائع کے مطابق راولپنڈی ایئرپورٹ جانے والے راستوں پر بھی رکاوٹیں برقرار رہیں، راستوں کی بندش سے مریضوں کو شدید مشکلات کا سامنا رہا،ہسپتالوں تک پہنچنا بھی مشکل ہوگیا۔

موٹروے پولیس کے مطابق ایم 2 موٹروے لاہور تا اسلام آباد ٹریفک کے لیے کھول دی گئی جس کے بعد ٹریفک کی آمدورفت معمول کے مطابق جاری رہی۔اسلام آباد ایکسپریس وے بھی ٹریفک کے لیے جزوی کھول دی گئی، نائنتھ ایونیو سے ڈبل روڈ کو ملانے والا راستہ بھی جزوی طور پر بحال کردیا گیا جبکہ راولپنڈی کی جانب سے فیض آباد جانے والا راستہ بند رکھاگیا۔دوسری جانب اسلام آباد اور راولپنڈی میں موبائل فون اور سیلولر انٹرنیٹ سروس جزوی طور پر بحال کر دی گئی ۔