محکمہ امورِ نوجوانان سندھ کے زیرِ اہتمام ذوالسانی مشاعرے کا انعقاد

اتوار 12 اکتوبر 2025 19:20

کراچی (اُردو پوائنٹ اخبارتازہ ترین - اے پی پی۔ 12 اکتوبر2025ء) محکمہ امورِ نوجوانان سندھ کے زیرِ اہتمام ذوالسانی مشاعرے کا انعقاد سندھ یوتھ کلب کراچی میں کیا گیا، جس میں اردو اور سندھی زبان کے معروف شعرا اور نوجوان شعرا نے شرکت کی۔اتوار کو ترجمان محکمہ امورِ نوجوانان کے مطابق 10سے زائد نوجوان شعرا نے اردو اور سندھی زبان میں اپنا کلام پیش کیا، جسے سامعین نے بھرپور داد دی۔

(جاری ہے)

اس موقع پر ڈپٹی ڈائریکٹر سید حبیب اللہ نے کہا کہ اس نوعیت کے ادبی پروگرام نوجوانوں کو مثبت سرگرمیوں کی طرف راغب کرتے ہیں اور انہیں اپنی صلاحیتیں اجاگر کرنے کا موقع فراہم کرتے ہیں۔مشاعرے کی صدارت معروف شاعر انور شعور نے کی جبکہ سندھی زبان کے ممتاز شعرا ادل سومرو، عتیق جیلانی، سانبیان سانگھی اور مسرور پیرزادہ نے خصوصی شرکت کی۔ تقریب کے اختتام پر شعرا کو اعزازی شیلڈز پیش کی گئیں جبکہ شرکا ء کیلئے عشائیے کا اہتمام کیا گیا۔ تقریب میں محکمہ امورِ نوجوانان سندھ کے افسران، اسسٹنٹ ڈائریکٹرز فرید علی، معیز احمد، رضوان احمد، ڈی ایس اوز اسماعیل شاہ، محمد عثمان، شکیل احمد اور سنی پرویز بھی موجود تھے۔