لاہور ، سبزیوں کی قیمتیں آسمان پر پہنچ گئیں، ٹماٹر 500روپے کلو ہوگیا

مذہبی جماعت کے احتجاج کے باعث سبزیوں کی سپلائی متاثر ،قیمتوں میں اضافہ ہوا،شہری

اتوار 12 اکتوبر 2025 21:50

لاہور(اُردو پوائنٹ اخبارتازہ ترین - این این آئی۔ 12 اکتوبر2025ء) لاہور میں سبزیوں کی قیمتوں نے ایک بار پھر آسمان کو چھو لیا ہے، ٹماٹر 500روپے کلو ہوگیا۔ذرائع کے مطابق لاہور کی مارکیٹوں میں سبزیوں کی قیمتیں عوام کی قوت خرید سے باہر ہونے لگیں، ٹماٹر جو چند روز قبل 300روپے فی کلو میں دستیاب تھا اب 500روپے کلو میں فروخت ہو رہا ہے۔

(جاری ہے)

بند گوبھی 120سے بڑھ کر 300،کھیرا 80سے بڑھ کر 140،شلجم 150سے بڑھ کر 300،میتھی 200سے بڑھ کر 400، پھلیاں 200سے بڑھ کر 300روپے فی کلو ہوگئیں جب کہ مونگرے 80روپے پا سے بڑھ کر 120روپے پا کے حساب سے فروخت کیے جا رہے ہیں۔

دکانداروں کا کہنا ہے کہ ایک مذہبی جماعت کے احتجاج اور ٹرانسپورٹ کے مسائل کے باعث سبزیوں کی سپلائی متاثر ہوئی ہے، جس کی وجہ سے قیمتوں میں اضافہ ہوا۔شہریوں نے کہاکہ حکومت مہنگائی پر قابو پانے میں ناکام ہو چکی ہے، سبزیاں خریدنا بھی اب مشکل ہوتا جا رہا ہے۔شہریوںنے حکومت سے مطالبہ کیاہے کہ سبزیوں کی قیمتوں میں کمی کے لیے فوری اقدامات کیے جائیں۔