محکمہ سیاحت پنجاب کے زیراہتمام خواتین بائیکرز کے اعزاز میں 18اور19اکتوبر کوپتریاٹہ کیمپنگ گالامنعقد ہو گا

اتوار 12 اکتوبر 2025 22:00

راولپنڈی (اُردو پوائنٹ اخبارتازہ ترین - اے پی پی۔ 12 اکتوبر2025ء) محکمہ سیاحت پنجاب (TDCP) پاکستان کی باہمت اور جرات مند خواتین بائیکرز کو خراجِ تحسین پیش کرنے کے لیے ایک دو روزہ رنگا رنگ کیمپنگ گالا کا انعقاد کر رہا ہے۔ یہ ایونٹ 18 اور 19 اکتوبر کو پنجاب کے حسین ترین سیاحتی مقام پتریاٹہ (روف ٹاپ آف پنجاب) میں منعقد ہوگا۔اس گالا میں ملک بھر سے خواتین بائیکرز کو مدعو کیا گیا ہے تاکہ ان کے حوصلے، کردار اور ایڈونچر کے جذبے کو سراہا جا سکے۔

ایم ڈی ٹی ڈی سی پی اور محکمہ سیاحت پنجاب کی میزبانی میں ہونے والا یہ ایونٹ قدرتی حسن، تفریحی سرگرمیوں اور سیاحتی کشش کا حسین امتزاج ہوگا۔کیمپنگ گالا کے دوران شرکاء کو جنگلات کے دلکش ماحول میں قیام و تفریح کا موقع میسر آئے گا۔

(جاری ہے)

پروگرام میں میوزیکل نائٹ، باربی کیو، بون فائر، مووی نائٹ، چیئر لفٹ و کیبل کار رائیڈ، گالف کارٹ ٹور، ٹری ہاؤس وزٹ، جنگل واک اور ٹریکنگ جیسی دلچسپ سرگرمیوں کا اہتمام کیا گیا ہے۔

محکمہ سیاحت کی جانب سے خواتین بائیکرز کو ان کی خدمات اور جذبہ ایڈونچر کے اعتراف میں تعریفی اسناد بھی پیش کی جائیں گی۔ تقریب کے مہمانِ خصوصی سیکرٹری سیاحت حکومتِ پنجاب ڈاکٹر احسان بھٹہ ہوں گے جن کی شرکت خواتین کی سماجی و سیاحتی سرگرمیوں میں بڑھتی ہوئی شمولیت کی علامت ہوگی۔یہ ایونٹ سینئر صوبائی وزیرمریم اورنگزیب کے خصوصی احکامات اور رہنمائی کے تحت منعقد کیا جا رہا ہے۔

محکمہ سیاحت پنجاب نے اعلان کیا ہے کہ مستقبل میں اس نوعیت کے مزید رنگا رنگ ایونٹس صوبے کے مختلف سیاحتی مقامات پر منعقد کیے جائیں گے تاکہ پنجاب اور پاکستان میں سیاحت کے فروغ کو مزید تقویت دی جا سکے۔محکمہ سیاحت پنجاب کے مطابق اس ایونٹ کا مقصد خواتین کو بااختیار بنانا، ان کے جذبہ ایڈونچر کو فروغ دینا اور پاکستان کے مثبت تشخص کو دنیا کے سامنے پیش کرنا ہے۔ قدرتی مناظر، دلکش موسم اور متنوع سرگرمیوں سے بھرپور پتریاٹہ کیمپنگ گالا خواتین بائیکرز کے لیے ایک یادگار تجربہ ثابت ہوگا۔