قتل، اغوا برائے تاوان، زیادتی، ڈکیتی سمیت دیگر سنگین جرائم میں ملوث گینگز کے خلاف کاروائیاں جاری ہیں، ترجمان پنجاب پولیس

اتوار 12 اکتوبر 2025 23:00

لاہور (اُردو پوائنٹ اخبارتازہ ترین - اے پی پی۔ 12 اکتوبر2025ء) لاہور سمیت صوبہ بھر میں پنجاب پولیس جرائم پیشہ و ملک دشمن عناصر کی سرکوبی کیلئے سرگرم عمل ہے جس کے تسلسل میں پنجاب پولیس قتل، اغوا برائے تاوان، زیادتی، ڈکیتی سمیت دیگر سنگین جرائم میں ملوث گینگز کے خلاف کاروائیاں جاری رکھے ہوئے ہے۔ تفصیلات کے مطابق ترجمان پنجاب پولیس نے بتایا کہ رواں سال کے دوران پنجاب پولیس نے 4574گینگز کے 11ہزار 198خطرناک مجرمان گرفتار کر لئے جبکہ مجرمان کے قبضہ سے 2ارب 72کروڑ سے زائد مالیت کا مال مسروقہ برآمد کر لیا۔

(جاری ہے)

ترجمان نے مزید بتایا کہ مال مسروقہ میں گاڑیاں، موٹر سائیکلیں، موبائل فونز، سونا، مویشی اور نقدی شامل ہے۔ ترجمان نے بتایا کہ مجرمان کے قبضہ سے 1430کلاشنکوف، 2320رائفلز، 27630پسٹلز، 2511بندوقیں، 380ریوالور، 2لاکھ سے زائد گولیاں بھی برآمد کی گئیں۔ اسی طرح صوبائی دارالحکومت لاہور میں 2273گینگز کے 5054مجرمان گرفتار کئے گئے۔ آئی جی پنجاب نے جرائم پیشہ افراد کے خلاف آپریشنز میں تیزی لانے کی ہدایت دیتے ہوئے کہا ہے کہ وزیر اعلی پنجاب کے ویژن کے تحت پنجاب کو کرائم فری صوبہ بنانے کیلئے مجرمان کیخلاف کارروائیاں جاری رکھی جائیں۔