ڈاکٹرعاصم کے خلاف مبینہ کرپشن کے ریفرنسز سے متعلق کیس ایف آئی اے منتقل نہ ہونے کے خلاف درخواست کی سماعت ملتوی

منگل 14 اکتوبر 2025 16:35

کراچی (اُردو پوائنٹ اخبارتازہ ترین - این این آئی۔ 14 اکتوبر2025ء) سندھ ہائی کورٹ نے ڈاکٹر عاصم حسین و دیگر کیخلاف اربوں روپے کی مبینہ کرپشن کے ریفرنسز سے متعلق کیس ایف آئی اے منتقل نہ ہونے اور مزید کارروائی نہ کرنے کیخلاف درخواست کی سماعت 22اکتوبر تک ملتوی کردی ہے ۔سندھ ہائیکورٹ میں ڈاکٹر عاصم حسین و دیگر کیخلاف اربوں روپے کی مبینہ کرپشن کے ریفرنسز سے متعلق کیس ایف آئی اے منتقل نہ ہونے اور مزید کارروائی نہ کرنے کیخلاف درخواست کی سماعت ہوئی۔

فریقین کی جانب سے خود یا کوئی وکیل پیش نہیں ہوا۔ درخواستگزار اشفاق پنہور ایڈووکیٹ نے موقف دیا کہ درخواست اہم ہے، طویل عرصے کیلیے ملتوی نا کی جائے۔عدالت نے سماعت 22 اکتوبر کے لیئے ملتوی کردی۔ دائر درخواست میں موقف اپنایا گیا کہ نیب نے ڈاکٹر عاصم حسین و دیگر کے 17 اور 462 ارب روپے کرپشن کا ریفرنس دائر کیئے تھے۔

(جاری ہے)

نیب ترمیم کے بعد عدالت نے ریفرنس واپس چیئرمین نیب کو بھیج دیئے تھے۔

عدالت نے ہدایت دی کہ چیئرمین نیب مزید کارروائی کیلئے متعلقہ فورم کو ارسال کریں۔ ریفرنس دائر ہونے کے باوجود 9 سال سے التوا کا شکار ہیں۔ ڈاکٹر عاصم حسین سمیت ہے ملزمان کیخلاف کارروائی نہیں ہو رہی۔ تمام ملزمان کیخلاف فوری ٹرائل کا آغاز کیا جائے۔ کیس اگر ایف آئی اے کا بنتا ہے تو فور طور پر ایف آئی اے کو ارسال کیا جائے۔ 17 اور 462 ارب روپے کی رقم فوری طور پر قومی خزانے میں واپس لائی جائے۔