مقبوضہ فلسطینی علاقوں میں ہماری موجودگی ہی ہماری مزاحمت، میئر رام اللہ

اسلام آباد (اُردو پوائنٹ ۔ UN اردو۔ 15 اکتوبر 2025ء) مقبوضہ مغربی کنارے کا مرکزی علاقہ رام اللہ ایک مصروف شہری مرکز ہے جس کی گلیوں اور بازاروں میں چہل پہل رہتی ہے لیکن یہاں اسرائیل کی عائد کردہ رکاوٹوں اور چیک پوسٹوں نے روزمرہ زندگی کو انتہائی مشکل بنا دیا ہے۔

شہر کے میئر عیسٰی قسیس کا کہنا ہے کہ دہائیوں پر محیط اسرائیل۔فلسطینی تنازع اور قبضے نے شہر کو درپیش مسائل مزید بڑھا دیے ہیں۔

انہوں نے کہا کہ رام اللہ یا دیگر مقبوضہ علاقوں میں رہنا استحقاق نہیں بلکہ بقا کا مسئلہ ہے۔

(جاری ہے)

United Nations

مقبوضہ مغربی کنارے کے جنین کیمپ میں قائم ایک چوکی۔

بنیادی خدمات پر دباؤ

پانی زندگی کی بنیادی ضرورت ہے اور رام اللہ میں اس کا حصول شہریوں کو درپیش روزمرہ مشکلات کی واضح عکاسی کرتا ہے۔

شہر کے کنویں اسرائیلی سکیورٹی کنٹرول کے تحت 'ایریا سی' میں واقع ہیں جہاں حملے اس کی ترسیل کو مزید خطرے میں ڈال دیتے ہیں جو پہلے ہی دنیا میں فی کس سب سے کم ہے جبکہ دوسری جانب، آباد کاروں نے اپنی بستیوں میں سوئمنگ پول بنا رکھے ہیں۔

شہری انتظامیہ نے گندے پانی کی صفائی اور آبپاشی کے منصوبوں میں سرمایہ کاری کی ہے اور رام اللہ کے عوامی مقامات کو سرسبز بنانے کے لیے استعمال شدہ پانی کو دوبارہ کام میں لایا گیا ہے۔

عیسٰی قسیس شہر کے پارکوں اور باغات کا تذکرہ کرتے ہوئے کہتے ہیں، سبزہ امید لاتا ہے اور جب امید دکھائی دیتی ہے تو لوگ اس کا دامن تھام لیتے ہیں۔

زندگی کا انتخاب

اقوام متحدہ کے امدادی رابطہ دفتر (اوچا) کے مطابق، اکتوبر 2023 سے مغربی کنارے میں 200 سے زیادہ بچوں سمیت تقریباً 1,000 فلسطینی ہلاک ہو چکے ہیں۔

رام اللہ کی بیشتر آبادی آبادی نوجوانوں پر مشتمل ہے جن میں 65 فیصد افراد کی عمر 40 سال سے کم ہے اور ان میں نصف سے زیادہ بچے اور نوجوان ہیں۔ یہ لوگ روزانہ امید اور خوف کے درمیان توازن قائم رکھنے کی جدوجہد کرتے ہیں کیونکہ ناجائز حراستیں اور ہراسانی ان کے لیے مستقل خطرات بن چکے ہیں۔

رام اللہ میں ہزاروں قیدی بھی موجود ہیں۔ روزانہ بہت سے لوگوں کو عدالتی احکامات کے بغیر حراست میں لیا جاتا ہے اور وہ چھ ماہ تک اسرائیل کی قید کاٹتے ہیں۔ اس مدت کو بار بار بڑھایا جا سکتا ہے۔ عیسٰی قسیس کے مطابق اس تمام عمل کا مقصد لوگوں کی روح کو توڑنا ہے۔ تاہم تمام مشکلات کے باوجود لوگوں کا مزاحمتی جذبہ ماند نہیں پڑا۔

وہ غزہ کے مسکراتے بچوں کا حوالہ دیتے ہوئے کہتے ہیں کہ لوگوں کا ہر حال میں زندگی کو منتخب کرنا ہی اصل مزاحمت ہے۔

United Nations

سڑک پر رکاوٹیں کھڑی کر کے مقبوضہ مغربی کنارے کے شمالی حصے کو رام اللہ میں داخلے کے راستے کو علیحدہ کیا گیا ہے۔

امید کی فصل

میئر کا کہنا ہے کہ رام اللہ میں برسوں کی محنت، تعلیم اور سبز مقامات کے ذریعے امید کاشت کی جا رہی ہے۔ بچوں کو زندگی، شہر کی خوبصورتی اور اپنے ورثے سے محبت کرنا سکھانا اسی عمل کا حصہ ہے اور یہ گویا شہری انتظامیہ کے ڈی این اے میں شامل ہے۔

علاقے میں ہر پارک، ہر سکول اور ہر درخت مزاحمت کی ایک چھوٹی سی بنیاد ہے اور انہیں رکاوٹوں سے بھری زمین میں امید کے بیج قرار دیا جا سکتا ہے۔

زمین سے محبت

اقوام متحدہ مسئلہ فلسطین کے دو ریاستی حل کی حمایت کرتا آیا ہے جس کا تصور ایک آزاد فلسطینی ریاست پر ہے جو اسرائیل کے ساتھ پرامن طور سے رہے۔ تاہم سرحدوں، بستیوں، یروشلم کی حیثیت، پناہ گزینوں اور سیکیورٹی انتظامات جیسے اہم مسائل اب بھی حل طلب ہیں۔

عیسٰی قسیس کا کہنا ہے کہ جب تک اس مسئلے کا کوئی سیاسی حل سامنے نہیں آتا رام اللہ کے لوگ ایک وقت میں ایک گھر، ایک خاندان اور ایک درخت کی امید سے وابستہ رہیں گے۔ اپنی زمین سے ان کی محبت اور اچھے مستقبل کی امید ہی انہیں آگے بڑھنے کا حوصلہ دیتی ہیں۔