بارڈر ملٹری پولیس ڈیرہ غازی خان کی منشیات سمگلنگ کے خلاف کارروائی، ملزم گرفتار

بدھ 15 اکتوبر 2025 15:16

ڈیرہ غازی خان (اُردو پوائنٹ اخبارتازہ ترین - اے پی پی۔ 15 اکتوبر2025ء) بارڈر ملٹری پولیس ڈیرہ غازی خان نے قبائلی علاقے کھر میں کارروائی کرتے ہوئے بلوچستان سے پنجاب منشیات سمگل کرنے کی بڑی کوشش ناکام بنا دی۔ کارروائی کے دوران گاڑی کے خفیہ خانوں سے 34 کلوگرام چرس برآمد کر کے ملزم اعجاز احمد اچکزئی کو موقع پر گرفتار کر لیا۔

(جاری ہے)

اس موقع پر کمانڈنٹ امیر تیمور خان نے کہا کہ بارڈر ملٹری پولیس نے سمگلرز اور جرائم پیشہ عناصر کے خلاف گھیرا تنگ کر دیا ہے۔

گرفتار ملزم کے خلاف تھانہ کھر میں مقدمہ درج کر کے مزید تفتیش شروع کر دی گئی ہے۔انہوں نے کہا کہ ملزم چرس کو گاڑی کے خفیہ خانوں میں چھپا کر بلوچستان سے پنجاب سمگل کرنے کی کوشش کر رہا تھا جسے بروقت کارروائی کے ذریعے ناکام بنایا گیا۔کمانڈنٹ بارڈر ملٹری پولیس نے قبائلی عوام سے اپیل کی کہ وہ علاقے سے جرائم اور سمگلنگ کے خاتمے کے لیے پولیس کے ساتھ تعاون کریں۔ انہوں نے کارروائی میں حصہ لینے والی ٹیم کو بھی شاباش دی۔