صدر زرداری سے رومانیہ کے لئے پاکستان کے نامزد سفیر الیاس محمود نظامی کی ملاقات

پاکستان اور رومانیہ کے درمیان کاروباری روابط کے فروغ سے باہمی تعلقات مزید مضبوط ہوں گے، صد رمملکت

بدھ 15 اکتوبر 2025 19:40

اسلام آباد (اُردو پوائنٹ اخبارتازہ ترین - این این آئی۔ 15 اکتوبر2025ء) صدر مملکت آصف علی زرداری سے رومانیہ کے لئے پاکستان کے نامزد سفیر الیاس محمود نظامی نے ایوان صدر میں ملاقات کی۔ایوان صدر کے پریس ونگ سے جاری بیان کے مطابق صدر مملکت نے الیاس محمود نظامی کو رومانیہ میں پاکستان کا سفیر نامزد ہونے پر مبارک باد دیتے ہوئے کہا کہ رواں سال پاکستان اور رومانیہ کے درمیان سفارتی تعلقات کے قیام کی 60 ویں سالگرہ منائی جا رہی ہے۔

(جاری ہے)

صدر آصف علی زرداری نے تجارت، سرمایہ کاری، ثقافت اور عوامی روابط میں تعاون کے فروغ پر زور دیتے ہوئے نامزد سفیر کو ہدایت کی کہ وہ معاشی سفارت کاری کو ترجیح دیں تاکہ دوطرفہ تجارت میں اضافہ ہو سکے۔ صدر مملکت نے قابل تجدید توانائی، ٹیکنالوجی اور زراعت کے شعبوں میں مواقع تلاش کرنے پر زور دیا۔صدر مملکت نے 2025ء کے تجارتی و اقتصادی تعاون کے معاہدے پر موثر عمل درآمد کی اہمیت پر زور دیتے ہوئے کہا کہ پاکستان اور رومانیہ کے درمیان کاروباری روابط کے فروغ سے باہمی تعلقات مزید مضبوط ہوں گے۔ صدر آصف علی زرداری نے پاکستانی ثقافت، فن اور ورثے کو اجاگر کرنے اور سمندر پار پاکستانیوں کے ساتھ رابطے بڑھانے کی ضرورت پر بھی زور دیا۔