پنجاب حکومت کا فلاحی منصوبے دھی رانی پروگرام کے تحت اجتماعی شادیوں کی تقریب ،سہیل شوکت بٹ اور فیصل ایوب کھوکھر کی شرکت

لاہور (اُردو پوائنٹ اخبارتازہ ترین - اے پی پی۔ 15 اکتوبر2025ء) پنجاب حکومت کے فلاحی منصوبے دھی رانی پروگرام کے تحت لاہور میں ایک عظیم الشان اجتماعی شادیوں کی تقریب منعقد ہوئی جس میں 130بیٹیاں باعزت طریقے سے اپنے نئے گھروں کو رخصت ہوئیں۔ ان میں 18 اقلیتی بیٹیاں اور ایک خصوصی بیٹی بھی شامل تھی۔تقریب میں صوبائی وزیر سوشل ویلفیئر و بیت المال سہیل شوکت بٹ اور صوبائی وزیر کھیل فیصل ایوب کھوکھر نے بطور مہمان خصوصی شرکت کی۔

تقریب سے خطاب کرتے ہوئے صوبائی وزیر سہیل شوکت بٹ نے کہا کہ میں بطور وزیر اپنی بہنوں اور بیٹیوں کو دھی رانی پروگرام میں شادی کی مبارک باد پیش کرتا ہوں۔ یہ وزیر اعلی پنجاب مریم نواز شریف کا تاریخ ساز اقدام ہے، جس نے ا ن بیٹیوں کی ترجمانی کی ہے جو برسوں سے آنکھوں میں خواب سجائے اپنے گھروں میں بیٹھی تھیں۔

(جاری ہے)

انہوں نے کہا کہ دھی رانی پروگرام کے ذریعے وزیر اعلی نے ان والدین کا بوجھ بانٹا ہے جو اپنی شرعی ذمہ داری پوری کرنے کے لیے پریشان رہتے تھے۔

یہ پروگرام کبھی نہ ختم ہونے والی دعائو ں کی بنیاد رکھ رہا ہے۔انہوں نے مزید کہا کہ ماضی میں بھی وزرائے اعلی آئے مگر اس سطح کا عوامی اور فلاحی منصوبہ کسی نے نہیں دیا۔سہیل شوکت بٹ نے کہا کہ ریاست کے وسائل عوام کی امانت ہیں اور آج پنجاب حکومت نے یہ ثابت کر دیا ہے کہ عوام کا پیسہ عوام کے خوابوں کی تکمیل کے لیے استعمال ہو سکتا ہے۔ دھی رانی پروگرام خوابوں کی تعبیر اور بیٹیوں کی عزت کا نشان بن چکا ہے۔

انہوں نے واضح کیا کہ اس سال پانچ ہزار اجتماعی شادیاں منعقد کی جائیں گی اور اگر دس یا پندرہ ہزار درخواستیں بھی موصول ہوئیں تو وزیر اعلی کی ہدایت پر ہر بیٹی کی شادی کرائی جائے گی۔ مسلم بیٹیاں ہوں یا اقلیتی برادری کی، سب کو برابر کا پروٹوکول دیا جائے گا۔ دھی رانی پروگرام سادگی، شفافیت اور عزت کی اعلی مثال ہے۔صوبائی وزیر نے اپنے خطاب میں کہا کہ آج پنجاب کی عوام دیکھ رہی ہے کہ وزیر اعلی نے وہ کر دکھایا ہے جس کا خواب دیہاتوں کی مائو ں اور بیٹیوں نے دیکھا تھا ۔

انہوں نے کہا کہ یہ صرف وسائل نہیں بلکہ محبت، احساس اور خلوص کا نتیجہ ہے۔ ایک بیٹی نے وزیر اعلی بن کر بیٹیوں کی طرح سوچا ہے۔ یہ کسی پر احسان نہیں بلکہ عوام کا حق ہے، کیونکہ یہ پیسہ عوام ہی کا ہے جو انہی پر خرچ ہو رہا ہے۔انہوں نے مزید کہا کہ وزیر اعلی کے سینکڑوں عوامی منصوبے جاری ہیں، دھی رانی پروگرام اور خواتین کے تحفظ کا نظام انقلابی اقدامات ہیں، اب کسی کو خواتین کی طرف میلی آنکھ سے دیکھنے کی جرات نہیں۔

پہلی بار پنجاب میں ایسی قیادت آئی ہے جو خواتین کے وقار کی محافظ ہے۔انہوں نے سابقہ حکومتوں پر تنقید کرتے ہوئے کہا کہ ماضی میں شادیوں کے نام پر ہونے والے پروگرام کرپشن کے گڑھ بن چکے تھے، لیکن آج کا یہ شفاف پروگرام خدمت اور خلوص کی مثال ہے۔آخر میں انہوں نے کہا کہ میں آج بطور باراتی اس تقریب میں شامل ہوں اور ان خوش نصیب جوڑوں کو خوشیوں بھری زندگی کی دعا دیتا ہوں۔