آسٹریلوی سوئمر نے اچانک ریٹائرمنٹ کا اعلان کر کے حیران کر دیا

جمعرات 16 اکتوبر 2025 20:10

سڈنی (اُردو پوائنٹ اخبارتازہ ترین - این این آئی۔ 16 اکتوبر2025ء) آسٹریلوی سوئمر آریارنے ٹٹمس نے اچانک ریٹائرمنٹ کا اعلان کر کے سب کو حیران کر دیا۔آسٹریلوی میڈیا کے مطابق 4 مرتبہ کی اولمپک گولڈ میڈلسٹ آریارنے ٹٹمس نے فوری ریٹائرمنٹ کا اعلان کیا ہے۔ 25 سالہ آریارنے ٹٹمس نے سوشل میڈیا پوسٹ میں ریٹائرمنٹ کا اعلان کرتے ہوئے کہا کہ یہ ایک مشکل فیصلہ ہے لیکن میں اس سے خوش ہوں۔

انہوں نے کہا کہ میں نے 18 سال سوئمنگ میں گزارے، 10 برس ملک کو دیے۔ میں نے ہمیشہ سوئمنگ سے پیار کیا ہے لیکن ایک وقت آیا جب سوئمنگ سے بڑھ کر بھی کچھ دیکھنا پڑتا ہے۔

(جاری ہے)

آریارنے ٹٹمس نے کہا کہ کینسر کا خوف میرے لیے ٹرننگ پوائنٹ تھا میں دماغی طور پر متاثر ہوئی۔واضح رہے کہ پیرس اولمپکس سے قبل آریارنے ٹٹمس کو کینسر کے ٹیومر کی سرجری کرانا پڑی تھی۔

آریارنے ٹٹمس نے پیرس اولمپکس میں دو سابقہ ورلڈ ریکارڈ ہولڈرز کو ہرا کر 400 میٹر فری اسٹائل میں گولڈ میڈل جیتا تھا۔ وہ 1964 کے بعد آسٹریلیا کی پہلی سوئمر تھیں جنہوں نے بیک ٹو بیک اولمپک گولڈ ایک ایونٹ میں جیتا تھا۔آریارنے ٹٹمس نے ٹوکیو اور پیرس اولمپکس میں مجموعی طور پر 8 میڈلز جیتے تھے۔ آریارنے ٹٹمس 200 اور 400 میٹر فری اسٹائل میں ورلڈ ریکارڈ ہولڈر ہیں۔