سفیرِ پاکستان فیصل نیاز ترمذی کیلئے اماراتی اعلیٰ ترین شہری ایوارڈ

جمعرات 16 اکتوبر 2025 20:10

ابو ظہبی (اُردو پوائنٹ اخبارتازہ ترین - این این آئی۔ 16 اکتوبر2025ء) پاکستان کے سفیر فیصل نیاز ترمذی کو متحدہ عرب امارات کی جانب سے اعلیٰ ترین شہری اعزاز فرسٹ کلاس آرڈر آف زاید II سے نوازا گیا ہے۔یہ اعزاز ابوظبی میں گزشتہ 3 سال سے تعینات سفیر فیصل نیاز ترمذی کی دو طرفہ تعلقات کو مضبوط بنانے میں نمایاں خدمات کے اعتراف میں دیا گیا ہے۔

(جاری ہے)

ابوظبی میں منعقدہ تقریب میں اماراتی معاون وزیرِ خارجہ خلیفہ شاہین المرار نے اعزاز پیش کیا اور اماراتی صدر شیخ محمد بن زاید النہیان اور نائب وزیر خارجہ شیخ عبداللّٰہ بن زاید النہیان کے پیغامات بھی سفیر تک پہنچائے۔

اس موقع پر سفیر فیصل نیاز ترمذی نے کہا کہ یہ اعزاز صرف ان کا نہیں بلکہ پاکستانی سفارت کاری اور کمیونٹی کی محنت کا اعتراف ہے۔انہوں نے اماراتی قیادت، سفارتخانے کے عملے اور پاکستانی کمیونٹی کا شکریہ ادا کیا۔سفیر نے کہا کہ وہ وزیرِ اعظم شہباز شریف اور وزیرِ خارجہ اسحاق ڈار کے تعاون اور اعتماد پر بھی ممنون ہیں اور یہ اعزاز دونوں ممالک کے درمیان تاریخی تعلقات کی مضبوطی کی علامت ہے۔