سپیکر قومی اسمبلی سردار ایاز صادق کی پہلے ہائپر اسپیکٹرل سیٹلائٹ (ایچ ایس۔ون) کی کامیاب لانچ پر سپارکو کے سائنسدانوں، انجینئرز اور قوم کو مبارکباد

اتوار 19 اکتوبر 2025 13:40

اسلام آباد (اُردو پوائنٹ اخبارتازہ ترین - اے پی پی۔ 19 اکتوبر2025ء) سپیکر قومی اسمبلی سردار ایاز صادق نے پہلے ہائپر اسپیکٹرل سیٹلائٹ (ایچ ایس۔ون) کی کامیاب لانچ پر سپارکو کے سائنسدانوں، انجینئرز اور قوم کو مبارکباد دی ہے۔اتوار کو قومی اسمبلی سیکرٹریٹ میڈیا ونگ سے جاری بیان کے مطابق سپیکر سردار ایاز صادق نے سپارکو کے سائنسدانوں اور انجینئرز کے لیے نیک تمناؤں کا اظہار کرتے ہوئے کہا کہ ایچ ایس-1 مشن کی کامیاب لانچ پاکستان کے خلائی تحقیقاتی پروگرام میں ایک تاریخی سنگِ میل ہے،ایچ ایس-1 سیٹلائٹ کی لانچ ملک میں سائنسی اور تکنیکی خودکفالت کی نئی راہیں ہموار کرے گی۔

سپیکر سردار ایاز صادق نے کہا کہ سپارکو کے سائنسدانوں، انجینئرز اور عملے نے قوم کا سر فخر سے بلند کر دیا ہے،ایچ ایس-1 سیٹلائٹ زراعت، ماحولیاتی استحکام اور شہری منصوبہ بندی میں ایک انقلابی پیش رفت ثابت ہوگا۔

(جاری ہے)

سپیکر سردار ایاز صادق نے کہا کہ سیٹلائٹ کے ذریعے فصلوں کی صحت، مٹی کی نمی اور قدرتی آفات کی مؤثر نگرانی ممکن ہو سکے گی،یہ مشن پاکستان کے پائیدار ترقیاتی اہداف کے حصول کی جانب ایک اہم قدم ہے۔

سپیکر سردار ایاز صادق نے کہا کہ یہ لانچ پاکستان کی سائنسی برادری کی محنت، وژن اور قومی عزم کی عکاس ہے،سپارکو کی یہ کامیابی نوجوان نسل کے لیے تحقیق اور جدت کی نئی تحریک بنے گی۔ سپیکر سردار ایاز صادق نے کہا کہ پارلیمنٹ، سپارکو اور دیگر سائنسی اداروں کی ترقی کے لیے تعاون جاری رکھے گی،ملک کو خلائی تحقیق کے میدان میں نمایاں مقام دلانے کے لیے تمام دستیاب وسائل بروئے کار لائے جائیں گے۔