کمشنر کا یونیورسٹی آف سرگودہا میں منعقدہ ایم ڈی کیٹ کے امتحانی مراکز کا دورہ، انتظامی امور کا جائزہ لیا

اتوار 26 اکتوبر 2025 17:00

سرگودھا (اُردو پوائنٹ اخبارتازہ ترین - اے پی پی۔ 26 اکتوبر2025ء) کمشنر سرگودہا ڈویژن جہانزیب اعوان نے یونیورسٹی آف سرگودہا میں منعقدہ ایم ڈی کیٹ 2025ء کے امتحانی مراکز کا دورہ کیا۔ ان کے ہمراہ ایڈیشنل ڈپٹی کمشنر (ریونیو)فہد محمود ، ایڈیشنل ڈپٹی کمشنر ( جنرل)رانا محمد ابوبکر،یونیورسٹی انتظامیہ اور دیگر متعلقہ افسران بھی موجودتھے۔امتحان میں مجموعی طور پر 2091 امیدواروں نے حصہ لیا، جن میں518 مرد اور 1573 خواتین شامل تھیں۔

مرد امیدواروں کے لیے امتحانی مرکز جناح بلاک جبکہ خواتین کیلئے اکنامکس ، ایجوکیشن، سائیکالوجی، کمپیوٹر سائنس اینڈ آئی ٹی ڈیپارٹمنٹ اور ملک فیروز خان نون بزنس اسکول میں انتظامات کیےگئے تھے ۔ کمشنر جہانزیب اعوان نے مختلف امتحانی کمروں، کنٹرول روم اور داخلی راستوں کا معائنہ کیا۔

(جاری ہے)

انہوں نے سکیورٹی،نگرانی، بجلی ، پانی، سایہ دار مقامات اور دیگر سہولیات کا جائزہ لیتے ہوئے تمام انتظامات پر اطمینان کا اظہار کیا۔

اس موقع پر کمشنرجہانزیب اعوان نے کہا کہ ایم ڈی کیٹ جیسے بڑے امتحانات میں شفافیت، نظم و ضبط اور سہولت کو یقینی بنانا ہماری اجتماعی ذمہ داری ہے۔ آج کا امتحان بخوبی مکمل ہوا جس کا سہرا ضلعی انتظامیہ، پولیس، یونیورسٹی اور محکمہ صحت کی مشترکہ کاوشوں کو جاتا ہے۔ طلبہ کے لیے ہر ممکن سہولت فراہم کی گئی تاکہ وہ اطمینان کے ساتھ امتحان دے سکیں۔