فیصل آباد ڈویژن سے جعلی سگریٹس کی روک تھام یقینی بنانے کے لئے آن گراؤنڈ اقدامات شروع کرنے کا فیصلہ کیا گیا ہے، کمشنر فیصل آباد

بدھ 26 نومبر 2025 19:54

فیصل آباد (اُردو پوائنٹ اخبارتازہ ترین - اے پی پی۔ 26 نومبر2025ء) وزیراعلی پنجاب مریم نواز شریف کی ہدایات کی روشنی میں فیصل آباد ڈویژن سے جعلی سگریٹس کی روک تھام یقینی بنانے کے لئے آن گراؤنڈ اقدامات شروع کرنے کا فیصلہ کیا گیا ہے جس کے تحت سگریٹ کی مینوفیکچرنگ،ویئر ہاؤسز،ڈسٹری بیوشن نیٹ ورک اور ریٹیلرز کو گرفت میں لایا جائے گا۔ کمشنر فیصل آباد راجہ جہانگیر انور کی زیر صدارت ڈپٹی کمشنرز،ایف بی آر اورمحکمہ ایکسائز اینڈ ٹیکسیشن ونارکوٹکس کنٹرول کا اہم اجلاس منعقد ہوا جس میں کمشنر نے ایف بی آر کو چاروں اضلاع میں فوکل پرسن مقرر،ایپلیکیشن سے متعلق ریونیو اور ایکسائز انسپکٹرز کی ٹریننگ کے لئے شیڈول تیار کرنے کی ضرورت پر زور دیا۔

انہوں نے کہا کہ متعلقین کو ایپ کے استعمال اور نشاندہی سمیت دیگر طریقہ کار سے آگاہی دیں تاکہ ریونیو اور ایکسائز ٹیمیں ایپلیکیشن کے ذریعے موقع پرسگریٹ پر ایکسائز ڈیوٹی چیک اور رپورٹ کریں۔

(جاری ہے)

کمشنر نے ڈپٹی کمشنرزسے کہا کہ وہ اپنے اضلاع میں پٹواری اور محکمہ ایکسائز کے انسپکٹرز کی فہرستیں مرتب اور کریک ڈاؤن کی تیاری کریں۔انہوں نے کہا کہ نشاندہی کے بعدایسے عناصر کے خلاف ایف بی آر قانونی ایکشن لے گا۔اجلاس میں ایف بی آر کے نمائندہ آفیسر نے بتایا کہ ایپ تیار کرلی گئی ہے اورجلد فوکل پرسن اضلاع میں جاکر ڈپٹی کمشنرز سے میٹنگ اور ٹریننگ کا شیڈول طے کرینگے۔