شہید محترمہ بے نظیر بھٹو کی 18ویں برسی کے سلسلے میں این اے 210 کا اہم اجلاس

جمعرات 25 دسمبر 2025 20:36

حیدرآباد (اُردو پوائنٹ اخبارتازہ ترین - اے پی پی۔ 25 دسمبر2025ء) شہید محترمہ بے نظیر بھٹو کی 18ویں برسی میں بھرپور شرکت اور دیگر تنظیمی امور کو حتمی شکل دینے کے لیے قومی اسمبلی کے حلقہ این اے 210 کا ایک اہم اجلاس گاؤں سنجر جونیجو میں رکن قومی اسمبلی صلاح الدین جونیجو کی صدارت میں منعقد ہوا۔ اجلاس میں جاوید شورو، رئیس کاشف مگسی، آصف رند، رئیس حبدار علی زرداری، عمران دھامرہ، وقار قادر جونیجو، ملک عارف، منور ابڑو، سالم ابڑو، رئیس زاہد عمرانی، ڈاکٹر شریف خاصخیلی، میر محمد ساند، اختر نظامانی، ذوالفقار زرداری، محبوب عالم اور سائیں بخش لغاری سمیت پاکستان پیپلز پارٹی کے عہدیداران، کارکنان، جیالوں، منتخب نمائندوں اور شہریوں کی بڑی تعداد نے شرکت کی۔

اجلاس سے خطاب کرتے ہوئے ایم این اے صلاح الدین جونیجو نے کہا کہ شہید محترمہ بے نظیر بھٹو نے جمہوریت، عوامی حقوق اور آئین کی بالادستی کے لیے اپنی جان قربان کی، یہ قربانی تاریخ میں ہمیشہ سنہری حروف سے لکھی جائے گی۔

(جاری ہے)

انہوں نے کہا کہ بھٹو خاندان کی ملک اور عوام کے لیے دی گئی قربانیاں آنے والی نسلوں کے لیے مشعلِ راہ ہیں۔ انہوں نے مزید کہا کہ پاکستان پیپلز پارٹی ہمیشہ غریبوں، محنت کشوں، ہاریوں اور محروم طبقات کی آواز رہی ہے اور حلقہ این اے 210 کے عوام سے کیے گئے تمام وعدے پورے کیے جائیں گے۔

ان کا کہنا تھا کہ شہید محترمہ کی برسی محض سوگ کا دن نہیں بلکہ ان کے مشن، نظریے اور عوام سے وابستگی کو ازسرِنو تازہ کرنے کا موقع ہے۔ انہوں نے بتایا کہ این اے 210 سے ہزاروں جیالے سینکڑوں گاڑیوں کے قافلوں کی صورت میں گڑھی خدا بخش پہنچ کر برسی کی تقریب میں شرکت کریں گے اور شہید محترمہ کو خراجِ عقیدت پیش کرتے ہوئے جمہوریت سے اپنی وفاداری کا اعادہ کریں گے۔ آخر میں ایم این اے صلاح الدین جونیجو نے مسیحی برادری کو کرسمس کی مبارکباد دیتے ہوئے کہا کہ پاکستان پیپلز پارٹی اقلیتوں کے حقوق کی محافظ جماعت ہے ۔