چیف منسٹرز پروگرام کے تحت 9,269 سے زائد معصوم بچوں کی مفت ہارٹ سرجریز کر چکے ہیں‘خواجہ سلمان رفیق

خیبر پختونخوا ہ کی378، آزاد کشمیر سے 225، اسلام آباد 99، بلوچستان 28، گلگت بلتستان سے 27 ،سندھ کی25 بچوں کی سرجری کی گئی

منگل 30 دسمبر 2025 21:10

لاہور(اُردو پوائنٹ اخبارتازہ ترین - این این آئی۔ 30 دسمبر2025ء) پنجاب میں کارڈیک کی سہولیات میں بہتری کے حوالے سے اہم اجلاس منعقد ہوا۔ اجلاس کی صدارت صوبائی وزیر صحت خواجہ سلمان رفیق نے کی۔ چیئرمین وزیر اعلی پنجاب ایڈوائزری کمیٹی برائے امراض قلب ڈاکٹر فرقد عالمگیر، ایگزیکٹو ڈائریکٹر پنجاب انسٹی ٹیوٹ آف کارڈیالوجی پروفیسر بلال محی الدین، ایم ایس پی آئی سی ڈاکٹر عامر رفیق بٹ و دیگر افسران نے اجلاس میں وڈیو لنک کے ذریعے شرکت کی۔

خواجہ سلمان رفیق کو اجلاس کے دوران کارڈیک سہولیات کے مانیٹرنگ فریم ورک، سروس ڈلیوری اور مریضوں کی سہولت کی خاطراٹھائے گئے اقدامات بارے بریفنگ دی گئی۔ صوبائی وزیرصحت خواجہ سلمان رفیق نے کارڈیک کے نئے اور منفرد پراجیکٹس میں شفافیت کو یقینی، سروس کا معیاربہتربنانے اور مریضوں کی آسانی کیلئے بہترین مانیٹرنگ کی اہمیت پر زور دیا ہے۔

(جاری ہے)

صوبائی وزیر صحت خواجہ سلمان رفیق نے اس موقع پر کہا ہے کہ وزیر اعلی پنجاب مریم نواز شریف کی قیادت میں شعبہ صحت کی بہتری کیلئے جدید اصلاحات لائی جا رہی ہیں۔ حکومت پنجاب عوام کو بہترین، معیاری اور مفت علاج فراہم کرنے کے اپنے عزم پر قائم ہے۔ چیف منسٹرز چلڈرن ہارٹ سرجری پروگرام کے تحت اب تک صوبہ بھر میں الحمداللہ 9,269 سے زائد معصوم بچوں کی اربوں روپوں کی لاگت سے بالکل مفت ہارٹ سرجریز کر چکے ہیں۔

چیف منسٹرز چلڈرن ہارٹ سرجری پروگرام کے تحت اب تک خیبر پختونخوا ہ سے تعلق رکھنے والے 378، آزاد کشمیر سے 225، اسلام آباد سے 99، بلوچستان سے 28، گلگت بلتستان سے 27 جبکہ سندھ سے تعلق رکھنے والے 25 بچوں کی بالکل مفت کارڈیک کی جا چکی ہیں۔ پنجاب کے کارڈیک انسٹی ٹیوٹس کی استدکار میں بھی اضافہ کیا جا رہا ہے۔ چاہتے ہیں کہ کارڈیک کے ان نئے پروگرامز سے امراض قلب میں مبتلا مریضوں کو زیادہ سے زیادہ فائدہ ہو۔ شعبہ صحت کی مزید بہتری کیلئے ہر ممکن اقدامات جاری رکھیں گے۔