پی ٹی آئی پر اعتماد نہیں کیا جا سکتا، ماضی میں بھی مذاکرات کو سبوتاژ کیا ہے. فیصل کریم کنڈی

مذاکرات اگر ہوں گے توعمران خان کی رہائی پر بات نہیں ہوگی، این آر او نہیں ملے گا. گورنر کے پی کےگفتگو

میاں محمد ندیم بدھ 31 دسمبر 2025 14:39

پی ٹی آئی پر اعتماد نہیں کیا جا سکتا، ماضی میں بھی مذاکرات کو سبوتاژ ..

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔31 دسمبر ۔2025 ) گورنر خیبرپختونخوا فیصل کریم کنڈی نے کہا ہے کہ پی ٹی آئی پر اعتماد نہیں کیا جا سکتا، ماضی میں بھی پی ٹی آئی نے مذاکرات کو سبوتاژ کیا ہے ایک انٹرویو میں فیصل کنڈی نے کہا کہ مذاکرات اگر ہوں گے تو عمران خان کی رہائی پر بات نہیں ہوگی، سابق وزیراعظم اپنی سزا بھگتیں گے، این آر او نہیں ملے گا انہوں نے کہا کہ وفاقی حکومت کی پی ٹی آئی سے مذاکرات سے متعلق پیپلز پارٹی سے ابھی بات نہیں ہوئی، مذاکرات کی بات ہوتی تو چیئرمین پیپلز پارٹی کوئی بیان دیتے.

(جاری ہے)

گورنر کے پی نے کہا کہ پی ٹی آئی نے ایک شخص کے لیے صوبے کو تباہ کیا ہوا ہے، پی ٹی آئی کو چاہیے کہ اپنے صوبے پر بھی توجہ دے فیصل کریم کنڈی کا کہنا تھا کہ 16 مہینے کی حکومت میں ہم نے اتحادیوں اور پی ٹی آئی کو بٹھایا تھا، اس کے بعد پی ٹی آئی نے 9 مئی جیسے واقعات کیے. انہوں نے کہا کہ ہم ہمیشہ چاہتے ہیں کہ سیاسی مسئلے کا حل سیاست دان نکالیں، پی ٹی آئی قیادت ایک طرف کہتی ہے کہ مذاکرات کرتے ہیں، دوسری طرف عمران خان اسلام آباد پر چڑھائی سے متعلق انتشار انگیز ٹوئٹ کرتے ہیں گورنر کے پی نے مزید کہا کہ پی ٹی آئی فیصلہ کرلے کہ ان کا اختیار کس کے پاس ہے؟ پی ٹی آئی والوں کا ایک دوسرے پر اعتماد ہی نہیں ہے.

فیصل کنڈی کا کہنا تھا کہ پی ٹی آئی نے اپوزیشن لیڈر کے لیے محمود اچکزئی اور علامہ ناصر عباس کا نام دیا، پتہ نہیں ان لیڈرز کی ایکسپائری تاریخ کب ہے؟ پی ٹی آئی کا کسی سے کام ختم ہو جائے تو اسے فارغ کر دیتی ہے.