کسٹمز انفورسمنٹ پشاور کی کارروائیاں ،دس کروڑ روپے سے زائد مالیت کا غیر ملکی کپڑا، سگریٹ اور دیگر سمگل شدہ اشیاء ضبط

بدھ 14 جنوری 2026 21:50

اسلام آباد (اُردو پوائنٹ اخبارتازہ ترین - اے پی پی۔ 14 جنوری2026ء) کلیکٹریٹ آف کسٹمز انفورسمنٹ پشاور نے گزشتہ ایک ہفتے کے دوران خفیہ اطلاعات کی بنیادوں پر کی گئی کارروائیوں میں غیر ملکی کپڑے، سگریٹ اور دیگر ممنوعہ اشیاء کی سمگلنگ کی متعدد کوششوں کو ناکام بناتے ہوئے سامان اور سمگلنگ میں استعمال ہونے والی گاڑیاں قبضے میں لے لیں۔ ضبط کی گئی اشیاء اور گاڑیوں کی مجموعی مالیت کا تخمینہ دس کروڑ انیس لاکھ روپے ہے۔

ایف بی آر کی جانب سے بدھ کویہاں جاری بیان کے مطابق ضبط کئے گئے سامان میں ساڑھے چار کروڑ روپے مالیت کے 14,000 سلیوز غیر ملکی سگریٹ ، ساڑھے تین کروڑ روپے مالیت کا 7,500 کلوگرام غیر ملکی کپڑا اور دو کروڑ انیس لاکھ روپے مالیت کے ٹائر، لیتھیم آئن بیٹریاں، چھالیہ، خشخاش اور خشک خمیر شامل ہیں۔

(جاری ہے)

انفورسمنٹ کارروائیوں کے ساتھ ساتھ کسٹمز کلیکٹریٹ پشاور سمگلنگ کے رجحانات کی نشاندہی اور خفیہ اطلاعات بروقت دیگر فیلڈ فارمیشنز کے ساتھ شیئر کرنے میں بھی فعال کردار ادا کر رہا ہے۔

اس سے کلیکٹریٹ کے دائرہ اختیار میں نان ڈیوٹی پیڈ اور ممنوعہ اشیاء کی نقل و حرکت کو روکنے کے لیے مربوط کوششیں ممکن بنائی جا رہی ہیں۔تمام ضبط شدہ سامان اور گاڑیوں کو کسٹمز ایکٹ 1969 کے تحت تحویل میں لے لیا گیا ہے اور مزید قانونی کارروائی جاری ہے۔ایف بی آر سمگلنگ کے خاتمے، قومی محاصل کے تحفظ اور انٹیلی جنس پر مبنی کارروائیوں اورقانون نافذ کرنے والے اداروں کے تعاون سے کسٹمز قوانین کی سخت انفورسمنٹ کے لیے پرعزم ہے۔