سمندر پار پاکستانیوں کو کسی بھی مشکل میں تنہا نہیں چھوڑیں گے‘گورنر پنجاب

بدھ 21 جنوری 2026 20:20

لاہور (اُردو پوائنٹ اخبارتازہ ترین - این این آئی۔ 21 جنوری2026ء) گورنر پنجاب سردار سلیم حیدر خان نے کہا ہے کہ سمندر پار پاکستانیوں کا ملکی معیشت میں اہم کردار ہے، مشکل کی ہر گھڑی میں اوورسیز پاکستانیوں نے وطن عزیز کا ساتھ دیا، سپہ سالار فیلڈ مارشل عاصم منیر نے بھارت کو شکست دے کر پاکستانیوں کا سر دنیا بھر میں فخر سے بلند کردیا، بلاول بھٹو زرداری نے سفارتی محاذ پر بھارت کا مکروہ چہرہ بے نقاب کیا۔

ان خیالات کا اظہار انہوں نے اپنے دورہ یورپ کے دوران برطانیہ میں گلاسکو کے قونصلیٹ سمیت مختلف تقریبات کے موقع پر خطاب کرتے ہوئے کیا۔ برطانیہ پہنچنے پر اوورسیز پاکستانی، پاکستانی قونصل جنرل ثمر جاوید اور چوہدری اسلم سمیت کاروباری شخصیات نے گورنر پنجاب کا بھر پور استقبال کیا اور پھولوں کے گلدستے پیش کئے۔

(جاری ہے)

گورنر پنجاب سردار سلیم حیدر خان نے کہا کہ اوورسیز پاکستانی ملک میں سرمایہ کاری کے ذریعے ملکی معیشت میں اہم کردار ادا کر رہے ہیں۔

انہوں نے کہا کہ سمندر پارپاکستانیوں کو پاکستان میں سرمایہ کاری کے لئے سازگار ماحول فراہم کرنا حکومت کی اولین ترجیح ہے۔گورنر پنجاب نے کہا کہ پاکستان پر جب بھی کوئی قدرتی آفات یا مشکل وقت آیا تو اوورسیز پاکستانیوں نے بھر پور ساتھ دیا۔انہوں نے کہا کہ برطانیہ سمیت پوری دنیامیں پاکستانی اپنے ہنر کے ذریعے پاکستان کا نام روشن کررہے ہیں۔

گورنر پنجاب نے کہا کہ ہم سمندر پار پاکستانیوں کو کسی بھی مشکل میں تنہا نہیں چھوڑیں گے۔گورنر پنجاب نے کہا کہ اوورسیز پاکستانیوں کو جھوٹی اور نفرت انگیز وڈیوذ دکھا کر ان کے جذبات اور پاکستان کے خلاف اکسانے والوں سے سختی سے نمٹا جائے گا۔انہوں نے کہا کہ سوشل میڈیا پر پاکستان اور پاکستانی اداروں کے خلاف جھوٹی اور من گھڑت خبروں کو پھیلانے والوں کے خلاف آہنی ہاتھوں سے نمٹا جائے گا۔

گورنر پنجاب نے کہا کہ پیپلزپارٹی نے ہمیشہ پاکستان کے لئے جانوں کے نذرانے پیش کئے اور عہدوں کی قربانیاں دیں۔انہوں نے کہا کہ چیئرمین بلاول بھٹو زرداری نے سفارتی محاذ پر بھارت کا مکروہ چہرہ بے نقاب کیا۔گورنر پنجاب نے کہا اوورسیز پاکستانیوں کو یقین دلاتا ہوں کہ بلاول بھٹو زرداری عوامی مینڈیٹ کے ذریعے پاکستان کے وزیر اعظم ہوں گے۔

انہوں نے کہا کہ پاکستان پیپلز پارٹی ایک محب وطن جماعت ہے اور اس نے کبھی اپنے کارکنوں اور جیالوں کو ملکی اداروں کے خلاف نہیں بھڑکایا۔گورنر پنجاب نے مزید کہا کہ ہمارے سپہ سالار فیلڈ مارشل عاصم منیر نے بھارت کو شکست دینے کے بنعد پاکستانیوں کا سر دنیا میں فخر سے بلند کیاہے۔انہوں نے کہا کہ ہماری پاک فوج بہادر اور ہر قسم کے چیلنجز کا سامنا کرنے کی بھر پورصلاحیت رکھتی ہے۔