ملک کے مختلف علاقوں میں شدید سردی اور بارش کا سلسلہ جاری

جمعہ 23 جنوری 2026 22:39

لاہور(اُردو پوائنٹ اخبارتازہ ترین - آن لائن۔ 23 جنوری2026ء) ملک کے مختلف حصوں میں بارش اور برفباری کے نئے سلسلے نے سردی کی شدت میں غیر معمولی اضافہ کر دیا ہے۔ متعدد شہروں میں موسم شدید سرد ہو چکا ہے جبکہ کئی مقامات پر برفباری اور موسلادھار بارش کے باعث سڑکیں بند، بجلی معطل اور ٹریفک کی روانی متاثر ہو گئی ہے۔لاہور میں بارش کے بعد موسم کا مزاج بدل گیا اور سردی کی شدت میں نمایاں اضافہ ریکارڈ کیا گیا۔

محکمہ موسمیات کے مطابق شہر میں مطلع جزوی طور پر ابر آلود ہے، کم سے کم درجہ حرارت 13 ڈگری سینٹی گریڈ اور ہوا میں نمی کا تناسب 94 فیصد ہے۔ شہر میں 10 کلومیٹر فی گھنٹہ کی رفتار سے ٹھنڈی ہوائیں چل رہی ہیں اور فضائی معیار بہتر ہوا ہے۔ آئندہ 24 گھنٹوں کے دوران لاہور میں 40 فیصد تک بارش کے امکانات ہیں۔

(جاری ہے)

کراچی میں شمال مشرقی یخ بستہ ہواؤں کے باعث سردی کی نئی لہر نے شہر کو اپنی لپیٹ میں لے لیا ہے۔

کم سے کم درجہ حرارت 11 ڈگری سینٹی گریڈ ریکارڈ کیا گیا جبکہ فضائی معیار بہتر ہوا اور شہر آلودہ ترین شہروں کی فہرست میں 72 ویں نمبر پر آ گیا ہے۔خیبر، آزاد کشمیر اور بالائی علاقوں میں شدید برفباری کے باعث موسم انتہائی سرد ہو گیا ہے۔ وادی نیلم میں درجہ حرارت منفی 10 سے منفی 9 ڈگری سینٹی گریڈ تک گر گیا، متعدد رابطہ سڑکیں بند اور ٹریفک معطل ہو گئی۔

سوات، کالام، مالم جبہ، مہوڈنڈ اوردیگر بالائی علاقوں میں برفباری جاری ہے جبکہ اپر سوات ڈیولپمنٹ اتھارٹی برف ہٹانے میں مصروف ہے۔مانسہرہ، شوگران اور کاغان میں بھی برفباری ہوئی، جس سے بجلی معطل اور اہم روڈز ٹریفک کے لیے بند ہو گئے۔ پنجاب کے شہر لاہور، سیالکوٹ، میانوالی اور رائیونڈ میں بارش اور ژالہ باری سے سردی میں اضافہ ہوا، کئی علاقوں میں بجلی معطل ہوئی۔

بلوچستان کے زیارت، کوژک ٹاپ، قلات، مسلم باغ اور چمن میں بھی شدید سردی اور برفباری دیکھی گئی، قلات میں منفی 10 ڈگری ریکارڈ کیا گیا۔پیسکو ریجن میں بارش کے باعث پشاور، مردان، بنوں، خیبر اور ڈی آئی خان میں 35 فیڈرز ٹرپ ہو گئے ہیں، تاہم بحالی کا کام جاری ہے۔محکمہ موسمیات، این ڈی ایم اے اور متعلقہ صوبائی اداروں نے عوام کو خبردار کیا ہے کہ شدید موسمی صورتحال کے پیش نظر غیر ضروری سفر سے گریز کریں، احتیاطی تدابیر اختیار کریں اور سرکاری ہدایات پر عمل کریں۔