عمران احمد خان نیازی کو قیدِ تنہا میں رکھنا بدترین ریاستی جبر ہے، رضوان نیازی

بدھ 4 فروری 2026 22:44

کراچی (اُردو پوائنٹ اخبارتازہ ترین - این این آئی۔ 04 فروری2026ء) پاکستان تحریکِ انصاف سندھ کے نائب صدر رضوان نیازی نے ملک کے اہم سیاسی و معاشی معاملات پر سخت ردِعمل دیتے ہوئے کہا ہے کہ قوم کے عظیم اور مقبول ترین لیڈر عمران احمد خان نیازی کو قیدِ تنہا میں رکھنا بدترین ریاستی جبر کی مثال ہے۔ 910 دن کی غیرقانونی قید نے نہ صرف بنیادی انسانی حقوق کو پامال کیا ہے بلکہ پاکستان کی عدالتی ساکھ کو بھی شدید نقصان پہنچایا ہے۔

انہوں نے کہا کہ عمران خان کی اہلیہ بشری بی بی کی قید انسانی حقوق کی کھلی خلاف ورزی ہے، جبکہ عدالتی احکامات کے باوجود وکلا اور اہلِ خانہ سے ملاقات نہ دینا صریح توہینِ عدالت کے مترادف ہے۔ یہ سب کچھ کسی ایک فرد کے خلاف نہیں بلکہ ایک منظم سیاسی انتقامی کارروائی ہے، جسے قوم کبھی معاف نہیں کرے گی۔

(جاری ہے)

رضوان نیازی نے کہا کہ فلسطین کے قاتلوں کے ساتھ بیٹھنا پاکستانی عوام کے جذبات کی توہین ہے۔

الیکشن ترمیمی بل 2026 کرپٹ اشرافیہ کو این آر او دینے کی سازش ہے، اثاثے چھپانا جمہوریت نہیں بلکہ عوام کی آنکھوں میں دھول جھونکنے کے مترادف ہے۔ ووٹنگ ایج بڑھانے کی کوشش نوجوانوں کے آئینی حق پر ڈاکا ہوگی، کیونکہ نوجوان ووٹرز سے خوف اس حکومت کی سیاسی کمزوری کو ظاہر کرتا ہے۔انہوں نے کہا کہ اربوں ڈالر کے قرضے کسی معاشی کامیابی کی علامت نہیں بلکہ حکومت کی مکمل ناکامی کا اعلان ہیں۔

عالمی مارکیٹ نے پاکستان کی معیشت پر عدم اعتماد کا اظہار کر دیا ہے اور موجودہ حکمران بری طرح ناکام ہو چکے ہیں۔ عمران احمد خان نیازی کے بغیر کوئی بھی ڈائیلاگ نہ قابلِ قبول ہے اور نہ ہی بامقصد۔رضوان نیازی نے واضح کیا کہ پوری قوم کا ایک ہی مطالبہ ہے کہ عمران خان کو فوری رہا کیا جائے۔ آٹھ فروری کے پرامن احتجاج کی آڑ میں کارکنوں کی بلاجواز گرفتاریاں ظلم ہیں، جبکہ پی ٹی آئی رہنماں اور کارکنوں کے گھروں پر چھاپے فوری بند کیے جائیں۔ انہوں نے کہا کہ ان اوچھے ہتھکنڈوں سے حقیقی آزادی کی تحریک کو دبایا نہیں جا سکتا۔