مسلم لیگی رہنما ندیم پہلوان کا سات روزہ دورہ سندھ کامیابی سے مکمل‘پنجاب واپس پہنچ گئے

منگل 10 فروری 2026 22:41

لاہور (اُردو پوائنٹ اخبارتازہ ترین - آن لائن۔ 10 فروری2026ء) کوآرڈینیٹر وزارتِ صنعت و تجارت پنجاب اور مسلم لیگ (ق) کے سرکردہ رہنما ندیم پہلوان ایک بڑے وفد کے ہمراہ اپنا سات روزہ دورہ سندھ کامیابی سے مکمل کرنے کے بعد پنجاب واپس پہنچ گئے ہیں۔دورے کا باقاعدہ آغاز حیدرآباد پریس کلب میں ایک پرہجوم پریس کانفرنس سے ہوا، جس میں ندیم پہلوان نے بین الصوبائی ہم آہنگی اور صوبوں کے مابین تجارتی و سماجی روابط کی مضبوطی پر زور دیا۔

کراچی آمد پر انہوں نے وفد کے ہمراہ مزارِ قائد پر حاضری دی۔ مزارِ قائد کی انتظامیہ کی جانب سے انہیں خصوصی پروٹوکول فراہم کیا گیا، جہاں انہوں نے بابائے قوم کے مزار پر فاتحہ خوانی کی، پھولوں کی چادر چڑھائی اور ملک و قوم کی سلامتی و خوشحالی کے لیے خصوصی دعا کی۔

(جاری ہے)

دورے کا سب سے اہم اور یادگار حصہ دربارِ عالیہ حضرت سخی لعل شہباز قلندرؒ کے سجادہ نشین سید مہدی شاہ کی میزبانی تھی۔

سید مہدی شاہ نے خصوصی محبت اور قلندری روایت کا پاس رکھتے ہوئے ندیم پہلوان اور ان کے تمام رفقاء کو اپنی ذاتی حویلی میں بطور مہمان ٹھہرایا۔ قیام کے دوران ندیم پہلوان نے دربارِ عالیہ پر منعقد ہونے والی مخصوص روحانی محفل شامِ قلندر میں بطور خاص شرکت کی۔ سجادہ نشین صاحب نے اپنی حویلی میں ندیم پہلوان اور ان کے وفد کے اعزاز میں خصوصی نشست کا اہتمام کیا اور انہیں دربار کے تبرکات پیش کیے۔

اس دورے کے دوران آل پاکستان دیسی کشتی فیڈریشن کے عہدیداران اور سندھ بھر سے آئے ہوئے پہلوانوں نے ندیم پہلوان کا والہانہ استقبال کیا۔ علاوہ ازیں، پاکستان مسلم لیگ (ق) سندھ کے مختلف عہدیداران سے ہونے والی ملاقاتوں میں تنظیمی امور، مستقبل کی سیاسی حکمتِ عملی اور پنجاب و سندھ کے عوامی روابط کو مزید فعال بنانے اور چوہدری شجاعت حسین، چوہدری شافع حسین اور چوہدری سالک حسین کی پاکستان کی ترقی و سلامتی کے لیے خدمات پر تبادلہ خیال کیا گیا۔

ماروی میمن نے ندیم پہلوان سے خصوصی ملاقات کی اور ان کو سندھ آنے پر خوشی آمدید کہا ۔ندیم پہلوان کے ہمراہ اس تاریخی دورے میں رانا مقصود، نوید پہلوان، عرفان بٹ، حسن باجوہ، وقار وکی، اکمل بٹ، سہیل بٹ، علی رضا، اعظم پہلوان، جہانزیب اور اقبال ببلی شامل تھے۔