ایم کیو ایم کے تمام دھڑے اور گروہ ایک ہی سوچ اور ایجنڈے پر کام کر رہے ہیں، قادر مگسی

جس طرح ماضی میں انہیں ناکامی کا سامنا کرنا پڑا، اسی طرح اب بھی سندھ کے عوام انہیں ناکام بنائیں گے، کراچی سندھ کی روح میں بسا ہوا ہے

منگل 24 فروری 2026 20:45

حیدرآباد(اُردو پوائنٹ اخبارتازہ ترین - این این آئی۔ 24 فروری2026ء) سندھ ترقی پسند پارٹی کے چیئرمین ڈاکٹر قادر مگسی نے کہا ہے کہ ایم کیو ایم کے تمام دھڑے اور گروہ ایک ہی سوچ اور ایجنڈے پر کام کر رہے ہیں، لیکن جس طرح ماضی میں انہیں ناکامی کا سامنا کرنا پڑا، اسی طرح اب بھی سندھ کے عوام انہیں ناکام بنائیں گے، کراچی سندھ کی روح میں بسا ہوا ہے، اور جب تک ایک بھی سندھی زندہ ہے، سندھ کی حدود کے ساتھ کوئی چھیڑ چھاڑ نہیں کر سکتا۔

ایک بیان میں ڈاکٹر قادر مگسی نے کہا کہ سندھ کی وحدت، شناخت اور تاریخی حیثیت کے خلاف ہونے والی کسی بھی سازش کو ہرگز قبول نہیں کیا جائے گا، سندھ صوفیوں، شہیدوں اور سیاسی جدوجہد کرنے والوں کی دھرتی ہے، جس کی بقا اور سالمیت کے لئے سندھ کے عوام ہر دور میں قربانیاں دیتے آئے ہیں اور اب بھی کسی بھی قسم کی ناانصافی یا سازش کو کامیاب نہیں ہونے دیں گے، انہوں نے کہا کہ موجودہ حالات میں گورنر سندھ کا کردار انتہائی متنازع بن چکا ہے، جس کے باعث صوبے کے اندر بے چینی میں اضافہ ہو رہا ہے، وفاق سے مطالبہ ہے کہ وہ فوری طور پر نوٹس لے کر گورنر کو ہٹائے تاکہ صوبے میں سیاسی استحکام بحال اور عوام میں پیدا ہونے والے خدشات کا خاتمہ ہو، انہوں نے کہا کہ سندھ کے خلاف ہونے والی سازش اسلام آباد سے شروع ہوئی ہے اور ایم کیو ایم اور گورنر ہاس میں بیٹھے عناصر اس کے مہرے ہیں، لیکن انہیں یہ نہیں بھولنا چاہیے کہ سندھ سات کروڑ انسانوں کا مادرِ وطن ہے، انہوں نے کہا کہ سندھ کے لوگ اپنے وطن کے دفاع کے لئے ہر قربانی دینے کے لئے تیار ہیں۔

(جاری ہے)

انہوں نے یاد دلایا کہ ماضی میں بھی جب کبھی سندھ کے خلاف کوئی منصوبہ سامنے آیا، تو سندھ کے عوام نے سیاسی جدوجہد، پرامن احتجاج اور عوامی تحریکوں کے ذریعے ان سازشوں کو ناکام بنایا، اور اب بھی تاریخ خود کو دہرائے گی، ڈاکٹر قادر مگسی نے اعلان کیا کہ 12 اپریل کو اپر سندھ سے کراچی تک کراچی سندھ ہے کے عنوان سے ایک بڑا عوامی جلسہ منعقد کیا جائے گا، جس میں اردو سمیت ہر زبان بولنے والے سندھی شرکت کریں گے، یہ جلسہ حکمرانوں اور سندھ دشمن قوتوں کے لیے واضح پیغام ہو گا اور سندھ کے عوامی ریفرنڈم کا ثبوت ثابت ہو گا۔