باچا خان یونیورسٹی اور آئی سی سی بی ایس کے درمیان مفاہمتی یادداشت پر دستخط

کراچی (اُردو پوائنٹ اخبارتازہ ترین - این این آئی۔ 06 مارچ2026ء) خیبر پختونخوا کی باچا خان یونیورسٹی، چارسدہ نے جامعہ کراچی کے بین الاقوامی مرکز برائے کیمیائی و حیاتیاتی علوم(آئی سی سی بی ایس)کے ساتھ مفاہمتی یادداشت پر دستخط کیے ہیں۔آئی سی سی بی ایس، جامعہ کراچی کے ترجمان نے جمعہ کے روز بتایا کہ مفاہمتی یادداشت پر دستخط شدہ دستاویزات کے بذریعہ کورئیر تبادلے کے ذریعے عمل درآمد کیا گیا۔

اس مفاہمتی یادداشت پر آئی سی سی بی ایس جامعہ کراچی کے ڈائریکٹر پروفیسر ڈاکٹر محمد رضا شاہ اور باچا خان یونیورسٹی کے وائس چانسلر پروفیسر ڈاکٹر خان عالم نے اپنے اپنے اداروں کی جانب سے دستخط کیے۔ اس مفاہمتی یادداشت کا بنیادی مقصد دونوں اداروں کے درمیان علمی تعاون کو فروغ دینا اور باہمی مفاہمت کو مستحکم کرنا ہے۔

(جاری ہے)

پروفیسر محمد رضا شاہ نے کہا کہ آئی سی سی بی ایس اس خطے کے ممتاز تحقیقی اداروں میں شمار ہوتا ہے۔

اس کی علمی اور تحقیقی صلاحیت کا اندازہ اس بات سے لگایا جا سکتا ہے کہ یہاں پاکستان کا سب سے بڑا ڈاکٹریٹ پروگرام چلایا جا رہا ہے۔ انہوں نے مزید کہا کہ یہی ادارہ جاتی اہمیت آئی سی سی بی ایس کو کیمیائی، حیاتیاتی اور حیاتی کیمیائی علوم کے میدان میں ایک نمایاں مرکزِ امتیاز بناتی ہے، جو مختلف ممالک کے محققین اور طلبہ کی تحقیق و تربیت کا مرکز ہے۔

انہوں نے یہ بھی بتایا کہ آئی سی سی بی ایس کو یونیسکو، عالمی ادارہ برائے صحت، ٹواس اور او آئی سی کی جانب سے مرکزِ امتیاز کا درجہ دیا جا چکا ہے۔یہ امر قابلِ ذکر ہے کہ باچا خان یونیورسٹی ایک ممتاز تعلیمی ادارہ ہے جو تعلیم، تحقیق اور سماجی خدمت میں اعلی معیار کے فروغ کے لیے کوشاں ہے۔ یونیورسٹی معیاری اور قابلِ رسائی تعلیم فراہم کرنے اور ایسے اسکالرز تیار کرنے کے لیے پرعزم ہے جو عصرِ حاضر کے عالمی چیلنجز کا مثر انداز میں مقابلہ کر سکیں۔

مفاہمتی یادداشت کے مطابق دونوں ادارے تحقیق، تدریس اور علمی تبادلے کے لیے اساتذہ، محققین اور ماہرین کے تبادلے کو فروغ دیں گے۔ دونوں اداروں نے مشترکہ تحقیقی پروگرام شروع کرنے اور قومی و بین الاقوامی فنڈنگ اداروں کو پیش کرنے کے لیے مشترکہ تحقیقی منصوبے تیار کرنے پر بھی اتفاق کیا ہے۔ اس معاہدے کے تحت اساتذہ اور محققین کو دونوں اداروں کی جانب سے منعقد ہونے والی کانفرنسوں، سمپوزیم، سیمینارز اور ورکشاپس میں شرکت کے مواقع بھی فراہم کیے جائیں گے۔