Live Updates

ایران حملوں کے باوجود پاکستان محفوظ، کوئی ماحولیاتی خطرہ نہیں،محکمہ موسمیات

بدھ 18 مارچ 2026 17:58

اسلام آباد (اُردو پوائنٹ اخبارتازہ ترین - این این آئی۔ 18 مارچ2026ء) محکمہ موسمیات پاکستان کے ترجمان نے واضح کیا ہے کہ موجودہ صورتِ حال میں پاکستان کسی بھی قسم کے ماحولیاتی یا تابکاری خطرے سے محفوظ ہے جبکہ ایران میں جاری بمباری کے باوجود کوئی منفی اثرات سامنے نہیں آئے۔ترجمان انجم نذیر کے مطابق محکمہ موسمیات ایران کے حکام کے ساتھ مسلسل رابطے میں ہے اور دونوں ممالک کے درمیان ڈیٹا کا تبادلہ جاری ہے تاکہ صورتِ حال پر کڑی نظر رکھی جا سکے۔

انہوں نے بتایا کہ ایرانی ڈیٹا کے مطابق بالائی فضا میں کسی قسم کے خطرناک آلودہ ذرات یا زہریلی گیسوں کے شواہد نہیں ملے جبکہ اب تک کی مانیٹرنگ میں تابکاری کے بھی کوئی آثار سامنے نہیں آئے۔انجم نذیر نے کہا کہ اگر خدانخواستہ کوئی تابکاری واقعہ پیش آتا ہے تو ہواؤں کے رخ کے باعث اس کے ممکنہ اثرات ترکمانستان کی جانب جا سکتے ہیں۔

(جاری ہے)

انہوں نے بتایا کہ ایران میں بمباری زیادہ تر شمال مغربی علاقوں میں ہو رہی ہے، جبکہ پاکستان کا سرحدی علاقہ ایران کے جنوبی حصے سے ملتا ہے جہاں صورتِ حال معمول کے مطابق ہے۔

ترجمان کے مطابق ایران کی حالیہ صورتحال 1992ء کی خلیجی جنگ جیسی نہیں جہاں بڑے پیمانے پر تیل کے کنوؤں کو آگ لگائی گئی تھی۔انجم نذیر کے مطابق گزشتہ رات بلوچستان، پنجاب اور بالائی سندھ میں ہونے والی بارش میں کوئی منفی اثرات نہیں دیکھے گئے، بارش فضا کو ہر قسم کی گرد اور آلودگی سے صاف کردیتی ہے۔انہوں نے کہا کہ محکمہ موسمیات بارش کے پانی کا تفصیلی جائزہ لے رہا ہے کہ پانی میں غیر معمولی ذرات تو شامل نہیں، 1992ء کے برعکس آج ہمارے پاس جدید سیٹلائٹ ٹیکنالوجی موجود ہے، سیٹلائٹ فضا میں کسی بھی زہریلے مادے یا دھوئیں کے بادل کو فوری ٹریس کرنے کی صلاحیت رکھتے ہیں، اب تک کی سیٹلائٹ تصاویر پاکستان کی فضائی حدود کو بالکل صاف ظاہر کر رہی ہیں، عوام افواہوں پر کان نہ دھریں حکومت اور متعلقہ ادارے صورتحال پر گہری نظر رکھے ہوئے ہیں۔