وزیراعلی کی ہدایت پر سکھ یاتریوں کی خدمت کیلئے تمام مشینری الرٹ

بیمار بھارتی یاتری کو پی آئی سی میں بہترین طبی سہولیات کی فراہمی

اتوار 12 اپریل 2026 21:35

لاہور(اُردو پوائنٹ اخبارتازہ ترین - این این آئی۔ 12 اپریل2026ء) وزیراعلی پنجاب مریم نواز شریف کی خصوصی ہدایات کی روشنی میں دنیا بھر سے آئے سکھ یاتریوں کو بہترین سہولیات اور تحفظ فراہم کرنے کے لیے پنجاب کی تمام سرکاری مشینری اس وقت ہائی الرٹ ہے۔ ننکانہ صاحب میں وساکھی فیسٹیول میں شریک بھارتی سکھ یاتری کرتار سنگھ کو اچانک دل کی تکلیف ہونے پر صوبائی وزیر اقلیتی امور رمیش سنگھ اروڑہ نے فوری ایکشن لیتے ہوئے انہیں ریسکیو 1122 کے ذریعے پنجاب انسٹی ٹیوٹ آف کارڈیالوجی لاہور منتقل کروایا۔

وزیر صحت خواجہ سلمان رفیق کے بھرپور تعاون اور ایم ایس ڈاکٹر عامر رفیق بٹ کو جاری کردہ خصوصی ہدایات کی بدولت یاتری کو ہنگامی بنیادوں پر بہترین طبی سہولیات فراہم کی گئیں، جس کے بعد ڈاکٹرز نے ان کی حالت کو خطرے سے باہر قرار دے دیا ہے۔

(جاری ہے)

صوبائی وزیر رمیش سنگھ اروڑہ کی ہدایت پر ہیڈ گرنتھی گیانی رنجیت سنگھ اور ڈپٹی ڈائریکٹر ہیومن رائٹس یوسف نے ہسپتال جا کر مریض کی عیادت کی اور انہیں صوبائی وزیر کی جانب سے گلدستہ پیش کرتے ہوئے نیک خواہشات کا اظہار کیا۔

اس موقع پر مریض کرتار سنگھ نے پاکستان میں فراہم کی جانے والی فوری اور معیاری طبی سہولیات پر وزیراعلی مریم نواز اور رمیش سنگھ اروڑہ کا شکریہ ادا کیا۔ صوبائی وزیر نے بروقت اقدامات پر وزیر صحت خواجہ سلمان رفیق، سیکرٹری ہوم پنجاب، ریسکیو 1122، ضلعی انتظامیہ، متروکہ وقف املاک بورڈ اور ایڈیشنل سیکرٹری شرائنز ناصر مشتاق کی کارکردگی کو سراہا اور ان کا شکریہ ادا کیا۔ انہوں نے واضح کیا کہ پاکستان تمام سکھ یاتریوں کا اپنا اصل گھر ہے اور ان کی صحت و تحفظ پر کوئی سمجھوتہ نہیں کیا جائے گا، تمام یاتریوں کے لیے 24 گھنٹے طبی سہولیات میسر ہیں اور تمام متعلقہ محکمے کسی بھی ہنگامی صورتحال سے نپٹنے کے لیے الرٹ ہیں۔