مہران یونیورسٹی کے طلبہ اعلیٰ تعلیم کیلئے چین چلے گئے

منگل 14 اپریل 2026 22:45

کراچی (اُردو پوائنٹ اخبارتازہ ترین - این این آئی۔ 14 اپریل2026ء) مہران یونیورسٹی آف انجینئرنگ اینڈ ٹیکنالوجی، جامشورو کے سات طلبہ پر مشتمل وفد اپنی تعلیم کے آخری سال کی تکمیل کے لیے چین چلے گئے ، جہاں وہ یونان ووکیشنل انسٹی ٹیوٹ آف انرجی ٹیکنالوجی میں زیرِ تعلیم رہیں گے۔گوادر پرو کے مطابق یہ طلبہ تانگ انٹرنیشنل ایجوکیشن کے تحت مائننگ انجینئرنگ کے ڈوئل ڈگری پلس ڈپلومہ پروگرام میں شامل ہیں۔

پروگرام کے مطابق طلبہ کو چین میں جدید تکنیکی تربیت اور بین الاقوامی تعلیمی ماحول میں سیکھنے کا موقع فراہم کیا جائے گا۔گوادر پرو کے مطابق تانگ پاکستان ٹیکنیکل ایجوکیشن کے حکام نے کہا کہ یہ اقدام پاکستان اور چین کے درمیان تعلیمی تعاون کے فروغ میں اہم پیش رفت ہے جس کا مقصد مائننگ اور وسائل کے شعبے کے لیے ماہر افرادی قوت تیار کرنا ہے۔

(جاری ہے)

اس پروگرام میں تعلیمی تعلیم کے ساتھ صنعتی نوعیت کی تربیت بھی شامل ہے تاکہ طلبہ کے روزگار کے مواقع بہتر بنائے جا سکیں۔رپورٹ کے مطابق کراچی ایئرپورٹ پر روانگی کے موقع پر طلبہ نے بینرز اٹھا رکھے تھے جن پر پروگرام کی تفصیلات درج تھیں۔ ایک بینر کے مطابق طلبہ ’’روشن مستقبل اور سی پیک منصوبوں میں روزگار‘‘کے حصول کیلئے چین جا رہے ہیں۔

اس میں بتایا گیا کہ یہ منصوبہ ٹینگ ایجوکیشن گروپ پاکستان کے تحت شروع کیا گیا اور یونان انرجی گروپ، چین کی جانب سے مکمل طور پر سپانسر کیا گیا ہے۔رپورٹ کے مطابق ایک اور بینر میں اس پروگرام کو مہران یونیورسٹی اور چینی اداروں کے درمیان مشترکہ کاوش قرار دیا گیا، جسے ’’انٹیلیجنٹ مائننگ ٹیکنالوجی میں چار سالہ ڈگری پلس ڈپلومہ پروگرام‘‘کا نام دیا گیا۔ اس موقع کو طلبہ کے لیے ایک اہم تعلیمی اور پیشہ ورانہ سنگِ میل قرار دیا جا رہا ہے۔