کرم ،پاراچنار میں افغان شہریوں کو جعلی پاکستانی شناختی کارڈز کے اجراء کا ایک بڑا اسکینڈل بے نقاب ہوگیا

اتوار 26 اپریل 2026 21:05

کوہاٹ (اُردو پوائنٹ اخبارتازہ ترین - این این آئی۔ 26 اپریل2026ء) قبائلی ضلع کرم کے صدر مقام پاراچنار میں افغان شہریوں کو جعلی پاکستانی شناختی کارڈز کے اجراء کا ایک بڑا اسکینڈل بے نقاب ہوگیا ہے۔ مقامی پولیس نی27 افراد کو نامزد کرتے ہوئے مختلف دفعات کے تحت مقدمہ درج کرلیا ہے۔نامزد ملزمان میں محکمہ ریونیو کے 5 پٹواری، نادرا کے 2 اہلکار، 4 ویلج کونسل سیکرٹریز اور 16 مقامی مشران (ملکان) شامل ہیں۔

(جاری ہے)

پولیس ذرائع کے مطابق اعلیٰ حکام کی رپورٹ کی روشنی میں سٹی پولیس اسٹیشن پاراچنار میں مقدمہ درج کیا گیاہے۔ بعض نامزد ملزمان نے مقامی عدالت سے قبل از گرفتاری ضمانت حاصل کرلی ہے جبکہ تاحال کسی بھی ملزم کی گرفتاری عمل میں نہیں آسکی۔واقعے نے علاقے میں تشویش کی لہر دوڑا دی ہے اور حکام نے مزید تحقیقات کا آغاز کردیا ہے۔ فوری طور پر یہ معلوم نہیں ہوسکا کہ کتنے افغان شہریوں کو جعلی شناختی کارڈز جاری کیے گئے۔