پاکستان پیپلزپارٹی کی عوامی حکومت نے قلیل عرصے میں عوامی فلاح و بہبود کے اقدامات کو ترجیح دی، فیصل ممتاز راٹھور

جمعرات 30 اپریل 2026 18:43

مظفر آباد (اُردو پوائنٹ اخبارتازہ ترین - اے پی پی۔ 30 اپریل2026ء) وزیراعظم آزاد جموں و کشمیر فیصل ممتاز راٹھور نےکہا ہے کہ پاکستان پیپلزپارٹی کی عوامی حکومت نے قلیل عرصے میں عوامی فلاح و بہبود کے لیے ایسے اقدامات کو ترجیح دی جنہوں نے نہ صرف مسائل کی شدت کو کم کیا بلکہ امید، اعتماد اور خوشحالی کی نئی کرن پیدا کی ہے۔ عوام میں اعتماد کی فضا پروان چڑھ رہی ہے جو کہ حکومت کے قلیل عرصے کے اقدامات کے مثبت نتائج کی عکاس ہے۔

ان خیالات کا اظہار انہوں نے وزیر زراعت و لائیو سٹاک چوہدری علی شان سونی سے ملاقات کے دوران گفتگو کرتے ہوئے کیا۔ اس موقع پر سینئر ممبر بورڈ آف ریونیو سردار محمد ظفر خان، معاون خصوصی برائے وزیراعظم سید عزادار حسین کاظمی، ترجمان شوکت جاوید میر و دیگر بھی موجود تھے۔

(جاری ہے)

اس موقع پرزرعی ترقی، لائیو سٹاک کے فروغ اور دیہی معیشت کو مستحکم بنانے کے حوالے سے مختلف امور پر تبادلہ خیال کیا گیا۔

وزیراعظم آزادکشمیر نے کہا کہ اوورسیز کنونشن کے انعقاد کا مقصد بیرون ملک مقیم کشمیریوں کو قومی دھارے میں شامل کرنا اور ان کی سرمایہ کاری کو ریاست میں لانا ہے، جبکہ زراعت کانفرنس کے ذریعے زرعی شعبے میں جدید اصلاحات متعارف کروانے کی راہ ہموار کی جا رہی ہے۔ وزیراعظم کا کہنا تھا کہ جاب فیسٹیول نوجوانوں کو روزگار کے بہتر مواقع فراہم کرنے کی ایک اہم کڑی ہے، جس سے بے روزگاری کے خاتمے میں مدد ملے گی۔

وزیراعظم نے کہا کہ حکومت زرعی شعبے کو جدید خطوط پر استوار کرنے کے لیے سنجیدہ اقدامات کر رہی ہے، تاکہ کسانوں کی آمدنی میں اضافہ اور ریاست کی معیشت کو مضبوط بنایا جا سکے۔ انہوں نے اس عزم کا اعادہ کیا کہ حکومت شفافیت، میرٹ اور عوامی خدمت کے اصولوں پر کاربند رہتے ہوئے ترقی کا سفر جاری رکھے گی۔ اس موقع پر چوہدری علی شان سونی نے وزیراعظم کو اپنے محکمے کی کارکردگی اور آئندہ کے منصوبوں سے آگاہ کیا۔