لاہور میں جیب سے کالعدم تنظیم کا ممبر شپ کارڈ ملنے کے الزام میں یوٹیوبر گرفتار

تلاشی کے دوران سعد کے پاس موجود بیگ سے اسامہ بن لادن سے متعلق کتاب کے پانچ نسخے برآمد ہوئے جو ممنوع کتب میں شمار ہوتی ہے، اس کے علاوہ سعد کے پاس سے القاعدہ کا ممبرشپ کارڈ بھی برآمد ہوا؛ ایف آئی آر کا متن

ساجد علی ہفتہ 2 مئی 2026 16:23

لاہور میں جیب سے کالعدم تنظیم کا ممبر شپ کارڈ ملنے کے الزام میں یوٹیوبر ..

لاہور (اُردو پوائنٹ اخبارتازہ ترین۔ 02 مئی2026ء) صوبہ پنجاب کے دارالحکومت لاہور میں کاؤنٹر ٹیررازم ڈپارٹمنٹ (سی ٹی ڈی) نے ایک یوٹیوبر کو مبینہ طور پر القاعدہ کے لیے لوگوں کو بھرتی کرنے کے الزام میں گرفتار کرلیا، تاہم اہلِخانہ نے سی ٹی ڈی کے ان دعوؤں کی تردید کردی۔ بی بی سی کے مطابق سی ٹی ڈی کی جانب سے گرفتار کیے جانے والے یوٹیوبر کی شناخت یوٹیوب چینل ایون نیوز سے منسلک محمد سعد بن ریاض کے نام سے ہوئی ہے، جن کے خلاف ایف آئی آر ایک اہلکار کی مدعیت میں دائر کی گئی ہے، ایف آئی آر میں اینٹی ٹیرر ازم ایکٹ 1997ء کی دفعات 11 ایف (2) اور 11 ڈبلیو شامل کی گئی ہیں، 11 ایف (2) کا تعلق کالعدم تنظیم کی رکنیت رکھنے اور 11 ڈبلیو نفرت انگیز مواد یا کسی دہشت گرد یا کالعدم تنظیم کا مواد شائع کرنے اور تقسیم کرنے کے متعلق ہے۔

(جاری ہے)

سی ٹی ڈی تھانے کے محرر تو قیر اسلم کی مدعیت میں درج ایف آئی آر میں کہا گیا ہے کہ 27 اپریل کی صبح وہ سی ٹی ڈی کے دیگر اہلکاروں کے ہمراہ اشتہاری مجرمان کی تلاش میں لاہور کے جی پی او چوک، مال روڈ پر موجود تھے کہ انہیں مخبر نے اطلاع دی کہ مزنگ روڈ پر واقع مسجد حنفیہ غوثیہ میں کالعدم تنظیم القاعدہ کا ایک مبینہ رکن موجود ہے جو لوگوں کو کالعدم تنظیم میں شامل ہونے کی دعوت دے رہا ہے اور ان میں ممنوعہ کتب بھی تقسیم کر رہا ہے۔

پولیس رپورٹ میں مزید تحریر کیا گیا ہے کہ جب صبح کے قریب ریڈ کی گئی تو مخبر کی نشاندہی پر ایک شخص کو گرفتار کیا گیا جس نے اپنا نام محمد سعد بن ریاض بتایا، تلاشی کے دوران سعد کے پاس موجود بیگ سے اسامہ بن لادن سے متعلق کتاب کے پانچ نسخے برآمد ہوئے جو ممنوع کتب میں شمار ہوتی ہے، اس کے علاوہ سعد کے پاس سے القاعدہ کا ممبرشپ کارڈ بھی برآمد ہوا۔

سعد بن ریاض کی اہلیہ عائشہ قیوم نے دعویٰ کیا ہے کہ صبح تقریباً ساڑھے تین بجے 12 سے 13 نقاب پوش مسلح افراد ان کے گھر میں داخل ہوئے اور سعد کو اپنے زبردستی اپنے ساتھ لے گئے، جب قانونی دباؤ ڈالا گیا تو اس کے بعد سی ٹی ڈی اہلکاروں نے انتہائی مضحکہ خیز بنیادوں پر ان کے شوہر کے خلاف ایف آئی آر درج کی، سعد ماضی میں ریاستی اداروں کے ساتھ بھی کام کر چکے ہیں۔