ٴنائب وزیراعظم اسحاق ڈار کی پاسپورٹ اجراء کے عمل کو تیز کرنے اور قونصلر خدمات میں بہتری کی ہدایت

اوورسیز پاکستانیوں کے لیے سہولیات پر مبنی نظام ناگزیر ہے، اسحاق ڈار اور محسن نقوی کا اہم مشاورتی اجلاس

منگل 5 مئی 2026 21:00

{اسلام آباد (اُردو پوائنٹ اخبارتازہ ترین - آن لائن۔ 05 مئی2026ء) نائب وزیراعظم و وزیر خارجہ سینیٹر اسحاق ڈار کی زیر صدارت قونصلر امور اور سروس ڈیلیوری کے نظام میں بہتری سے متعلق ایک اہم اجلاس منعقد ہوا۔ اجلاس میں وفاقی وزیر داخلہ محسن نقوی، سیکرٹری خارجہ آمنہ بلوچ اور دیگر اعلیٰ حکام نے شرکت کی۔اجلاس کے دوران نائب وزیراعظم نے قونصلر خدمات کی فراہمی میں وزارت خارجہ اور متعلقہ محکموں کے درمیان مؤثر رابطہ کاری کو سراہا۔

انہوں نے متعلقہ حکام کو سخت ہدایات جاری کیں کہ قونصلر خدمات میں مزید سہولت پیدا کی جائے تاکہ عوام کو درپیش مشکلات کا خاتمہ ہو سکے۔ اسحاق ڈار نے خاص طور پر پاسپورٹ کے اجراء میں تاخیر کا نوٹس لیتے ہوئے اس عمل کو تیز اور مزید مؤثر بنانے پر زور دیا۔

(جاری ہے)

انہوں نے مزید کہا کہ ملک کے اندر موجود شہریوں اور بیرون ملک مقیم پاکستانیوں کو بروقت معاونت فراہم کرنا حکومت کی اولین ترجیح ہے۔

اسحاق ڈار کا کہنا تھا کہ اوورسیز پاکستانی ملک کا قیمتی اثاثہ ہیں، ان کے لیے "سٹی زن فرینڈلی" یا شہری سہولت پر مبنی نظام کو مزید بہتر بنانے کی اشد ضرورت ہے تاکہ انہیں کسی بھی قانونی یا دفتری کارروائی میں دشواری کا سامنا نہ کرنا پڑے۔ وزیر داخلہ محسن نقوی نے بھی اس موقع پر عوامی سہولیات کی فراہمی کے لیے ہر ممکن تعاون کا یقین دلایا