Live Updates

ایران: نوبیل انعام یافتہ نرگس محمدی کی گرتی صحت بارے تشویش

یو این منگل 5 مئی 2026 21:15

اسلام آباد (اُردو پوائنٹ ۔ UN اردو۔ 05 مئی 2026ء) ایران میں قید انسانی حقوق کی نوبیل اعزاز یافتہ کارکن نرگس محمدی کی صحت کے بارے میں تشویش بڑھتی جا رہی ہے جنہیں مبینہ طور پر خطرناک جرائم میں ملوث قیدیوں کے ساتھ رکھا گیا ہے۔

اقوام متحدہ کے ترجمان سٹیفن ڈوجیرک نے نیویارک میں معمول کی پریس بریفنگ کے موقع پر کہا ہے کہ سیکرٹری جنرل انتونیو گوتیرش کو نرگس محمدی کی طبی حالت پر سخت تشویش ہے اور انہوں نے ایران کے حکام سے مطالبہ کیا ہے کہ کم از کم انہیں ان کی صحت کے مطابق طبی سہولیات بلاتاخیر مہیا کی جائیں۔

اطلاعات کے مطابق، نرگس محمدی کو گزشتہ ہفتے جیل سے ہسپتال منتقل کیا گیا تھا جنہیں دل کی ایک خطرناک بیماری کے لیے خصوصی علاج کی ضرورت ہے۔

اقوام متحدہ کے ہائی کمشنر برائے انسانی حقوق وولکر ترک نے گزشتہ ہفتے جاری کردہ بیان میں کہا تھا کہ نرگس محمدی کی صحت پہلے سے موجود پرانی بیماریوں کے باعث مزید بگڑ گئی ہے جو طویل عرصہ تک قید میں رہنے کا نتیجہ ہیں۔

(جاری ہے)

ہائی کمشنر نے خبردار کیا کہ ایران میں قیدخانوں کے حالات نہایت ابتر ہیں۔ قیدی گنجائش سے کہیں زیادہ بھری جیلوں میں خوراک، پانی، صحت و صفائی کے سامان اور ادویات کی شدید کمی کا شکار ہیں اور اکثر انہیں طبی سہولیات بھی مہیا نہیں کی جاتیں۔

نرگس محمدی کا شمار ایران میں انسانی حقوق کے لیے کام کرنے والے نمایاں لوگوں میں ہوتا ہے۔ انہیں ملک میں خواتین پر جبر کے خلاف آواز اٹھانے پر 2023 میں امن کا نوبیل انعام دیا گیا تھا۔