آئی جی پنجاب عبدالکریم سے سی ایس ایس میں نمایاں کامیابی حاصل کرنیوالے انٹیلی جنس آفیسر محسن خالد کی ملاقات

محسن خالد کی ملک بھر میں دوسری پوزیشن، پاکستان ایڈمنسٹریٹو سروس میں سلیکشن پر مبارکباد

بدھ 6 مئی 2026 19:36

لاہور (اُردو پوائنٹ اخبارتازہ ترین - این این آئی۔ 06 مئی2026ء) انسپکٹر جنرل پولیس پنجاب عبدالکریم سے سی ایس ایس امتحان میں نمایاں کامیابی حاصل کرنے والے پنجاب پولیس کے انٹیلی جنس آفیسر محسن خالد نے سنٹرل پولیس آفس لاہور میں ملاقات کی۔ آئی جی پنجاب نے محسن خالد کو سی ایس ایس امتحان میں ملک بھر میں دوسری پوزیشن حاصل کرنے اور پاکستان ایڈمنسٹریٹو سروس میں سلیکشن پر دلی مبارکباد پیش کی۔

ٓئی جی پنجاب عبدالکریم نے بینائی کے پیدائشی مرض کے باوجود شاندار کامیابی حاصل کرنے پر محسن خالد کو خراج تحسین پیش کرتے ہوئے کہا کہ ان کی یہ کامیابی عزم، محنت اور حوصلے کی روشن مثال ہے۔ آئی جی پنجاب نے محسن خالد کے والدین کی کاوشوں کو بھی سراہا جنہوں نے مشکل حالات کے باوجود اپنے بیٹے کی بہترین تعلیم و تربیت کو یقینی بنایا۔

(جاری ہے)

آئی جی پنجاب کا کہنا تھا کہ محسن خالد نے سی ایس ایس میں کامیابی حاصل کر کے نہ صرف محکمہ پولیس بلکہ پورے صوبے کا نام روشن کیا ہے۔

انہوں نے محسن خالد کو ہدایت کی کہ پیشہ ورانہ ذمہ داریوں کو بہتر انداز میں سمجھتے ہوئے جدید تقاضوں اور نئے آئیڈیاز کے تحت شہریوں کی بھرپور خدمت کو اپنا نصب العین بنائیں۔ترجمان پنجاب پولیس نے بتایا کہ محسن خالد سپیشل برانچ پنجاب میں بطور انٹیلی جنس آفیسر خدمات انجام دے رہے ہیں اور انہوں نے 2025 میں محکمہ پولیس میں شمولیت اختیار کی۔ آئی جی پنجاب نے محسن خالد کو ہدایت کی کہ وہ اپنی ٹریننگ بھرپور تندہی، لگن اور محنت سے مکمل کریں تاکہ مستقبل میں ملک و قوم کی مزید بہترانداز میں خدمت کر سکیں۔