پاکستان میں سول اور ملٹری ہم آہنگی کے نتائج ہمارے سامنے ہیں، عون چودھری

جمعرات 7 مئی 2026 13:35

لندن (اُردو پوائنٹ اخبارتازہ ترین - این این آئی۔ 07 مئی2026ء) وزیرمملکت برائے اوورسیز پاکستانی و انسانی وسائل عون چودھری نے کہا ہے کہ پاکستان میں سول اور ملٹری ہم آہنگی اور ایک پیچ کے نتائج ہمارے سامنے ہیں۔لندن میں میڈیا سے گفتگو کرتے ہوئے انہوں نے کہا کہ دنیا بھر میں جو اس وقت پاکستان کی عزت ہے وہ اسی انڈر اسٹینڈنگ کی وجہ سے ہے، فیلڈ مارشل اور وزیراعظم کی پارٹنر شپ پاکستان کو مزید ترقی دے گی،آنے والے وقت میں آپ اور اچھی خبریں سنیں گے۔

عون چودھری نے کہا کہ ایسی اصلاحات کر رہے ہیں کہ ایک مثالی پاکستان بن کر سامنے آئے، ثالثی کرا کر پاکستان نے دنیا میں ایک پر امن ملک ہونے کا پیغام دیا ہے۔انہوں نے کہا کہ پاکستان نے امن کیلئے بھرپور کوشش کی، جس کا خصوصی سہرا وزیراعظم اور فیلڈ مارشل کو جاتا ہے، خدا کرے کہ پاکستان کی کاوشوں کے سبب امن قائم ہو اور پوری دنیا میں امن کا پیغام جائے۔

(جاری ہے)

وزیر مملکت برائے اوورسیز پاکستانی نے کہا کہ شہباز شریف تمام اوورسیز پاکستانیوں کے بھی وزیراعظم ہیں، جولائی میں لندن میں روڈ شو منعقد کریں گے جس میں اوورسیز پاکستانیوں کو سرمایہ کاری کی سہولتوں کے بارے میں آگاہ کیا جاسکے۔عون چودھری کا مزید کہنا تھا کہ پاکستان میں رئیل اسٹیٹ سمیت متعدد شعبوں میں سرمایہ کاری کے مواقع موجود ہیں۔