فیلڈ مارشل کی قیادت پر یقین کریں، امریکہ ایران مذاکرات پر اچھا رزلٹ ملے گا، محسن نقوی

اسلام آباد (اُردو پوائنٹ اخبارتازہ ترین۔ 07 مئی2026ء) وفاقی وزیر داخلہ محسن نقوی کا کہنا ہے کہ معرکہ حق میں فیلڈ مارشل کو اللہ کی مدد حاصل تھی، جس کا میں خود عینی شاہد ہوں، ایسے ہی انہیں ایران امریکہ مذاکرات کیلئے بھی اللہ کی مدد حاصل تھی، فیلڈ مارشل کی قیادت پر یقین کریں، امریکہ ایران مذاکرات پر اچھا رزلٹ ملے گا۔ اسلام آباد میں پریس کانفرنس کرتے ہوئے انہوں نے کہا کہ معرکہ حق میں ہمیں اللہ کی مدد آئی اور میں ان لوگوں میں شامل تھا جو اس مدد کے عینی شاہد ہیں۔

محسن نقوی کہتے ہیں کہ ہماری آرمی، فضائیہ اور نیوی نے بہت اہم کردار ادا کیا، اس میں انٹیلیجنس ایجنسیز کا کردار بھی بہت اہم تھا، ہمارا اتفاق ہے جس نے ہمیں جتایا، جس اتفاق سے ہم جنگ کے دوران لڑے اسی اتفاق سے ہمیں اب بھی رہنا چاہیے، جتنا محنتی انفارمیشن منسٹر ہمارے پاس ابھی ہے میں نے بطور صحافی کبھی نہیں دیکھا، جس طرح وزارت اطلاعات اور آئی ایس پی آر نے محنت کی قابل ستائش ہے، آئی ایس پی آر آج بھی زبردست ہے۔

(جاری ہے)

انہوں نے مزید کہا کہ جنگ کے دوران انڈیا کی جانب سے چھوٹے اور درمیانے درجے کے ڈرونز کے ذریعے حملے کیے گئے اور مختلف پاکستانی شہروں کو نشانہ بنانے کی کوشش کی گئی، انڈین میڈیا گھنٹوں تک یہ دعوے کرتا رہا کہ پاکستانی ڈرونز نئی دہلی میں وزیراعظم ہاؤس اور دیگر حساس مقامات تک پہنچ گئے، انڈیا کی جانب سے پاکستان میں داخل ہونے والے بیشتر ڈرونز کو سرحد عبور کرتے ہی یا شہری حدود میں داخل ہونے سے قبل ہی مار گرایا گیا، ان انڈین حملوں کے نتیجے میں پاکستان کے نوجوان شہید ہوئے، تاہم پاکستان نے جارحیت کا بھرپور دفاعی جواب دیا۔

وزیر داخلہ کا کہنا ہے کہ صدر اور وزیراعظم پاکستان جنگ کے دوران کسی بنکر میں نہیں گئے، ملڑی سیکریٹری نے صدر پاکستان آصف علی زرداری سے کہا آپ بنکر میں چلے جائیں، صدر پاکستان نے جواب دیا اگر میری شہادت یہاں لکھی ہے تو یہاں ہی ہو گی، پاکستان کے جوابی اقدامات کے بعد بھارت کو سفید جھنڈا لہرانا پڑا اور جنگ بندی کی اپیل کرنا پڑی، پاکستانی نوجوانوں نے سائبر حملوں کو بھی کامیابی سے ناکام بنایا، اور یہ سب اس نوعیت کی جنگ میں پہلی بار ہوا۔

انہوں نے یہ بھی کہا کہ جنگ کے دوران قومی میڈیا نے بہترین کارکردگی دکھائی اور پوری قوم کو متحد رکھا، پاکستان نے پہلے ہی انڈیا کو واضح پیغام دے دیا تھا کہ ہم چھپ کر وار نہیں کریں گے، اور جب بھی ردِعمل دیں گے کھل کر اور سامنے سے دیں گے، ایک موقع پر پاکستان کی ایک بیس پر 16 میزائل فائر کیے گئے، تاہم مسلح افواج صورتحال سے مکمل طور پر آگاہ تھیں، 16 میں سے 14 میزائل بروقت ناکارہ بنا دیئے گئے، ہدف انتہائی محدود جگہ پر تھا، اس کے باوجود پاکستان نے کامیابی حاصل کی اور یہ سب اللہ تعالیٰ کی مدد سے ممکن ہوا۔

محسن نقوی نے بتایا کہ انڈین جنگی طیارے اور حساس علاقوں کی سرگرمیاں پاکستان کے ریڈار پر تھیں، صورتحال واضح ہونے کے بعد بھارت نے خود جنگ بندی کی طرف قدم بڑھایا، انڈین اداروں کے سربراہان نے بھی تسلیم کیا کہ انھیں اس آپریشن میں بھاری نقصان اٹھانا پڑا، معرکہ حق میں فیلڈ مارشل سید عاصم منیر کا کردار کلیدی تھا اور وہ ائیر چیف کے ساتھ مسلسل رابطے میں رہے، نیول چیف بھی اسی رابطے کا حصہ تھے، اس نوعیت کی مشترکہ فیصلہ سازی کی اس سے قبل مثال نہیں ملتی۔

وزیرداخلہ کا کہنا ہے کہ ایسے بڑے فیصلوں کے لیے غیر معمولی جرات درکار ہوتی ہے، جس کے نتائج آج پوری دنیا کے سامنے ہیں، جنگ کے دوران جو کچھ ہوا، پوری دنیا نے دیکھا، اور پاکستان کی کامیابیوں کا سلسلہ بدستور جاری ہے، فیلڈ مارشل سید عاصم منیر نے ایران اور امریکہ کے درمیان مذاکرات میں بھی اہم کردار ادا کیا، ایران اور امریکہ کے درمیان صورتحال غیر معمولی حد تک آگے بڑھ چکی تھی اور دونوں فریقوں کو دوبارہ مذاکرات کی میز تک لانا آسان نہیں تھا۔