سرکاری سکیم کے تحت حج آپریشن کامیابی سے جاری ، اب تک 39,959 عازمین سعودی عرب پہنچ چکے ہیں ،وزارت مذہبی امور

بدھ 6 مئی 2026 15:09

مکہ مکرمہ – (اُردو پوائنٹ اخبارتازہ ترین - اے پی پی۔ 06 مئی2026ء) سرکاری سکیم کے تحت ’’حج آپریشن 2026ء‘‘ کامیابی سے جاری ہے،پاکستان سے اب تک 39,959 خوش نصیب عازمین حج سعودی عرب پہنچ چکے ہیں جو کہ مجموعی سرکاری کوٹے کا تقریباً 34 فیصد ہے۔ وفاقی وزارت مذہبی امور کے مطابق حجاج کرام کی خدمت اور انہیں ہرممکن سہولت فراہم کرنے کے لیے اب تک مختلف سٹیشنز پر 949 خدام الحجاج اور ویلفیئر سٹاف کو مامور کر دیا گیا ہے، یہ عملہ عازمین کی آمد سے لے کر ان کی رہائش گاہوں تک منتقلی اور دیگر انتظامی امور میں ہمہ وقت معاونت فراہم کر رہا ہے۔

کوآرڈنیٹر فیسیلی ٹیشن اینڈ کوآرڈنیشن ناصر عزیز خان کے مطابق اب تک مجموعی طور پر 155 پروازیں عازمین حج کو لے کر سعودی عرب پہنچ چکی ہیں، اس وقت 26,679 عازمین مکہ مکرمہ جبکہ 13,280 مدینہ منورہ میں قیام پذیر ہیں۔

(جاری ہے)

عازمین کو بہترین ماحول فراہم کرنے کے لیے تعینات کیے گئے 949 اہلکاروں میں 599 معاونین، 184 طبی ماہرین اور 158 خدام (ایس ڈی ایس)شامل ہیں۔

ناصر عزیز خان نے بتایا کہ مکہ مکرمہ اور مدینہ منورہ میں تعینات یہ عملہ چوبیس گھنٹے مختلف شفٹوں میں عازمین کی خدمت کے لیے الرٹ ہے۔ یومیہ رپورٹ کے مطابق اب تک مکہ مکرمہ اور مدینہ منورہ کی ڈسپنسریوں اور ہسپتالوں میں 8,156 عازمین کو طبی سہولیات فراہم کی جا چکی ہیں۔ مکہ مکرمہ میں 7,375 عازمین کو راستوں کی تلاش میں مدد دی گئی جبکہ مدینہ منورہ میں 20,962 عازمین نے ریاض الجنہ کی زیارت کا شرف حاصل کیا۔

مدینہ منورہ میں گمشدہ سامان سے متعلق موصول ہونے والی 2,900 درخواستوں میں سے 2,886 کا فوری ازالہ کر کے سامان اصل مالکان تک پہنچا دیا گیا ہے۔ ناصر عزیز خان نے اس عزم کا اعادہ کیا کہ حکومت پاکستان عازمین کو آرام دہ سفر اور قیام کی فراہمی کے لیے تمام تر وسائل بروئے کار لا رہی ہے تاکہ وہ یکسوئی کے ساتھ مناسک حج ادا کر سکیں۔\932