عمران خان کو علاج کیلئے چاند پر بھی بھیجنا پڑے تو بھیج دیں، ایمل ولی خان

ماضی میں نواز شریف کو علاج کی غرض سے لندن جانے کی اجازت دی گئی تھی، اگر عمران خان اور بشریٰ بی بی کی صحت سے متعلق مسائل درپیش ہیں تو انہیں بھی طبی سہولت فراہم کی جانی چاہیے، میڈیا سے گفتگو

فیضان ہاشمی جمعہ 8 مئی 2026 11:32

عمران خان کو علاج کیلئے چاند پر بھی بھیجنا پڑے تو بھیج دیں، ایمل ولی ..

اسلام آباد (اُردو پوائنٹ اخبارتازہ ترین۔ 08 مئی2026ء) عوامی نیشنل پارٹی کے سربراہ سینیٹر ایمل ولی خان کا کہنا ہے کہ عمران خان کو علاج کیلئے چاند پر بھی بھیجنا پڑے تو بھیج دیں. اسلام آباد میں صحافیوں سے گفتگو کرتے ہوئے ان کا کہنا تھا کہ اگر حکام کو اس بات پر خدشہ ہے کہ جیل سے باہر آنے والا کوئی بھی شخص سیاسی سرگرمیوں میں حصہ لے گا تو اس مسئلے کے حل کے لیے ایک غیرجانبدار کمیٹی قائم کی جانی چاہیے۔

(جاری ہے)

اس کمیٹی میں تمام بڑی سیاسی جماعتوں کے نمائندوں کو شامل کیا جائے تاکہ فیصلے شفاف اور متفقہ انداز میں کیے جا سکیں۔ انہوں نے کہا کہ ماضی میں نواز شریف کو علاج کی غرض سے لندن جانے کی اجازت دی گئی تھی، لہٰذا اگر عمران خان اور بشریٰ بی بی کی صحت سے متعلق مسائل درپیش ہیں تو انہیں بھی طبی سہولت فراہم کی جانی چاہیے۔

صحت پر سیاست نہ کریں
اگر ان کو شک ہے کہ جیل کے اندر جانے والا شخص باہر آکر سیاسی گفتگو کرے گا تو ایک ایسی غیرجانبدار کمیٹی تشکیل دی جائے جس میں مختلف سیاسی جماعتوں کے نمائندے شامل ہوں نواز شریف کو علاج کے لیے لندن بھیجا جا سکتا ہے اور عمران خان اور بشریٰ بی بی کی صحت کا مسئلہ ہے… pic.twitter.com/mKWZiMBrDS
— Muhammad Faheem (@MeFaheem) May 7, 2026

ایمل ولی خان کا کہنا تھا کہ انسانی ہمدردی اور قانون کی بالادستی کو سیاسی اختلافات سے بالاتر رکھا جانا چاہیے۔ انہوں نے زور دیا کہ سیاسی استحکام کے لیے یکساں اصول اپنانا ناگزیر ہے تاکہ کسی بھی فیصلے پر جانبداری کا تاثر پیدا نہ ہو اور جمہوری عمل مضبوط ہو سکے۔