آئی پی ایل میں گرل فرینڈز کلچر اور ’ہنی ٹریپ‘ کا خدشہ، بھارتی بورڈ نے حکم نامہ جاری کردیا

بھارتی بورڈ نے غیر متعلقہ افراد کی ہوٹل میں آمد، آنرز کی نقل و حرکت اور ویپ پینے پر پابندی عائد کردی

ذیشان مہتاب جمعہ 8 مئی 2026 14:27

آئی پی ایل میں گرل فرینڈز کلچر اور ’ہنی ٹریپ‘ کا خدشہ، بھارتی بورڈ ..

ممبئی (اردو پوائنٹ تازہ ترین اخبار ۔ 8 مئی 2026ء ) بھارتی کرکٹ بورڈ(بی سی سی آئی) نے آئی پی ایل میں گرل فرینڈزکلچر اور غیر متعلقہ افرادکی آمدورفت کا نوٹس لے لیا۔

بھارتی میڈیا رپورٹ کے مطابق آئی پی ایل میں کوڈ آف کنڈکٹ کی متعدد خلاف ورزیاں کی گئیں جس پر بھارتی بورڈ نے نوٹس لیتے ہو ئے سخت ہدایات نامہ جاری کیا ہے۔

بھارتی بورڈ نے آئی پی ایل ٹیموں کو 8 صفحاتی حکم نامہ جاری کیا ہے جس میں کھلاڑیوں اور ٹیموں کواحکامات جاری کیے گئے ہیں کہ مستقبل میں خلاف ورزی برداشت نہیں کی جائے گی جب کہ حکم نامے کا اطلاق فوری طور پر ہو گا اور ہدایت نامے میں تمام پروٹوکولز کو تفصیلی انداز میں بتایا گیا ہے۔

بھارتی میڈیا کے مطابق بورڈ کے اینٹی کرپشن اینڈ سکیورٹی یونٹ نے خلاف ورزیوں کی نشاندہی کی ہے جب کہ رپورٹ میں فرنچائز مالکان کے پی ایم او اے پروٹوکولز کی خلاف ورزی کا بھی بتایا گیا ہے۔

(جاری ہے)

بھارتی بورڈ کےاینٹی کرپشن اینڈ سکیورٹی یونٹ کی جانب سے خلاف ورزیوں کی نشاندہی پر کھلاڑیوں اور ٹیموں کو مستقبل میں خلاف ورزی سے گریز کرنے کی ہدایت کی گئی ہے۔

حکم نامے کے مطابق غیر متعلقہ افراد کے ہوٹل میں داخلے پر پابندی ہوگی، ٹیم مینجر کے علم میں لا کر ملنے کی اجازت ہوگی، مہمان اور وزیٹر ز کو ہوٹل کی مخصوص جگہ پر ملا جاسکے گا اور کوئی مہمان ہوٹل کے کمرے میں نہیں جائے گا۔

حکم نامے میں یہ بات بھی کی گئی ہے کہ ہوٹل سے باہرجانے کے لیے سکیورٹی اور ٹیم مینجر کو پہلے بتانا لازمی ہوگا جب کہ ڈگ آؤٹ میں ٹیم آنرز یا ان کے نمائندے کھلاڑیوں سے بات چیت نہیں کر سکیں گے۔

بھارتی بورڈ نے غیر متعلقہ افراد کی ہوٹل میں آمد، آنرز کی نقل و حرکت اور ویپ پینے پر پابندی عائد کردی ہے۔